Salmo 81 - Kalin Apo Dios

¹ Menday-eng kayo ken Apo Dios ay menkamkamangan tako. Ibiyadyo nan gasingyo isnan Dios din si Jacob.

² Owen, menkanta kayo ya kolkolongenyo gedan nan makwani en pandereta dayopay kotengtengen nan makwani en arpa ya nan tap-in di kotengteng.

³ Mentanggoyob kayo gedan isnan menlagsakan tako isnan timpon di tekwa ya teke.

⁴ Tay linteg di Israelita dana ay bilin nan Dios din si Jacob.

⁵ Owen, inbilina ken daida ay Israelita ay ap-on din si Jose ta mangnemnemnemanda isdin nangdosaana isnan iyEgipto. Et dinngen nan Israelita id isdi nan adida maawatan ay kali.

⁶ Kinwanin Apo Dios en, “Kinaanko nan mendagsen ay binoboliganyo et nawayaan kayo isnan inaawityo ay mendagsen.

⁷ Isdin maligligatanyo et nindawat kayo ken sak-en et insalakanko dakayo. Isnan kad-ak id daya et sinongbatak dakayo isnan kido daket padasen dakayo isdin kawad-anyo isnan balaan id Meriba.

⁸ Dakayo ay ipogawko, dengngenyo nan ibagbagak ken dakayo. Owen, idngeyo koma sak-en dakayo ay Israelita.

⁹ Maid polos koma teken is diosyo. Owen, adi kayo mendaydayaw is teken ay dios

¹⁰ tay sak-en nan apo ay Diosyo ay nang-ikaan ken dakayo id Egipto. Sak-en pay gedan nan mangidya isnan am-in ay masapolyo.

¹¹ Ngem egay kayet inidngen nan ipogawko sak-en. Owen, daida ay Israelita et egayda tinongpal sak-en.

¹² Isonga isnan kinakedseda et binaybay-ak daida ay mang-ikkan isnan kaykaytenda.

¹³ Dengngen koma nan ipogawko sak-en ya mangtongpalda ay Israelita.

¹⁴ Tay no mangtongpalda et siawyan daket abaken nan mangbosboso ya am-in ay mang-aamis ken daida.

¹⁵ Menlokbob nan mangliliget ken sak-en ay apo gapo is egyatda ya maid patenggan nan madosaanda.

¹⁶ Ngem dakayo ay ipogawko et awnitak pakanen dakayo is kaimisan ay makan dakpay peneken dakayo is kaimisan ay dilo.”