Salmo 80 - Kalin Apo Dios

¹ apo, dengngem dakami, sik-a ay menpaspastol isnan Israelita. Owen, dengngem dakami sik-a ay mang-ipangpango isnan ipogawmo ay ap-on din si Jose. Sik-a ay naipatokdo isnan oson di makwani en kerubim,

² et ipailam nan layadmo isnan pangbon din da Efraim, Manases ya ken Benjamin. Ipailam nan pigsam dakat omali ta isalakanmo dakami.

³ Apo Dios, isagongmo kad dakami isnan sigod ay kababalinmi. Ipailam nan layadmo ken dakami ta maisalakan kami.

⁴ apo ay Dios ay manakabalin, ay kaatna pay di kabayag di ligetmo dapay menlol-owalo met nan ipogawmo?

⁵ Ligat nan kanegmo ipakpakan ken dakami ya nan adoado ay aga nan kanegmi in-inomen.

⁶ Intotolokmo nan il-ili ay sagsagogongmi ta men-giginowadanda nan ilimi ya baibainan nan mangbosboso dakami.

⁷ Apo Dios ay manakabalin, isagongmo kad dakami isnan sigod ay kababalinmi. Ipailam nan layadmo ken dakami ta maisalakan kami.

⁸ Dakami ay ipogawmo et kanegmi nan menkawat ay esek ay inkaanmo id Egipto dakat is-ek isnan daga ay ginowadmo isnan akindaga.

⁹ Issan nang-ipatawidam isnan daga et kanegmo insagana nan lota esakapay is-ek san menkawat ay esek et domaem nan lamotna daet menpingipingi.

¹⁰ Kinawatana nan bilbilig ya olay nan anatakdag ay kak-aiw.

¹¹ Intoloyna ay menkawat enggana ay inomdan isnan baybay ay Mediterranean ya isnan ginawang ay Eufrates isnan bas-angna.

¹² Ngem ayta dakan dinadael nan baked et nalaka et ay maakew nan begasna

¹³ ya sobasoben ya kanen nan boka ya nan tap-in di atap ay animal.

¹⁴ Apo Dios ay manakabalin, badangam kasin dakami. Osdongam dakami id issa daya ta seg-angam dakami ay inis-ekmo tay inomdan nan mamakedse ay kaneg mangsobasob ken dakami.

¹⁵ Omalika ta isalakanmo dakami ay inis-ekmo ya nan egay kaeteng ay pingi ay pinapigsam.

¹⁶ Isnan ligetmo et dosaem nan mangpoo ya mangpoka isnan esekmo.

¹⁷ Ngem badangam nan kaipoipogaw ay pinilim ay nan kaipoipogaw ay pinapigsam pala ken sik-a.

¹⁸ Dakamit adi kasin dokdokogan et sik-a ya papigsaem dakami ta daydayawenmi sik-a.

¹⁹ apo ay Dios ay manakabalin, isagongmo kad dakami isnan sigod ay kababalinmi. Ipailam nan layadmo ken dakami ta maisalakan kami.