Salmo 8 - Kalin Apo Dios

¹ O apo, sik-a nan Apomi. Napatepateg nan ngadanmo isnan batawa. Omdan id daya nan maidaydayawam

² isnan mang-ikankantaan nan oongong-a. Sineyatam nan mang-ap-apos ken sik-a ya inpaginekmo am-in ay mang-adi ken sik-a.

³ No ilaek nan daya ay binoliwmo, nan bowan ya nan katalatalaw ay inippeymo,

⁴ et nemnemek en ay napateg ngen nan ipogaw ta nemnemnemem daida? Kaskasdaaw nan mangsegseg-angam ken daida ay aped ipogaw et kedeng.

⁵ Id wani ipabababam daida mo nan aanghel ngem sin-awyan et kedeng tay awnitmo ipangato ya patgepatgen daida.

⁶ Pinaapom daida isnan am-in ay binoliwmo ta itolayanda nan am-in ay binoliwmo

⁷ ay nan am-in ay talaken ay kaneg nan kalnilo ya baka ya olay nan atap ay animal,

⁸ ya nan koyat, nan ikan ya nan am-in ay wada isnan baybay.

⁹ apo, sik-a nan Apomi. Kapatgan nan ngadanmo isnan batawa.