Salmo 79 - Kalin Apo Dios

¹ Apo Dios, singgep nan sangaili nan daga ay inpatawidmo isnan ipogawmo. Et linogitanda nan nadiosan ay Templom ya binakasda nan ili ay Jerusalem.

² Inpakanda nan aw-awak di natey ay ipogawmo isnan koykoyat ya isnan atap ay animal.

³ Inbokbokda ay kaneg danom nan basan nan ipogawmo id Jerusalem ya maid nabay-an is mang-ikaob ken daida.

⁴ Sayosayoten nan naisasag-en ay il-ili dakami dadapay am-ammengan ya iiyawen dakami.

⁵ apo, kaatna pay nan kabayag di ligetmo ken dakami, ay itoltoloymo ay eng-enggana? Ay itotoloymo kayet ay men-im-imon?

⁶ Itolongmo nan ligetmo isnan adi mang-ikaskaso ken sik-a ya isnan kaipoipogaw ay adi mangdaydayaw ken sik-a

⁷ tay pinateyda nan kakailyanmi ya dinadaelda nan ilimi.

⁸ Adim koma dosaen dakami gapo isnan basbasol din alal-apomi. Esapay omam-amed nan ligat et seg-angam koma dakami tay maidet namnamami.

⁹ Apo Dios ay mang-isalsalakan, badangam kad dakami tapno maidayaw nan ngadanmo. Isalakanmo dakami dakapay pakawanen nan basbasolmi tapno mapateg nan ngadanmo.

¹⁰ Ayta od dan kanan nan sasangaili en, “Into pay od nan Dios di Israelite?” Ipagtekmo koma ken daida ya ipailam gedan ken dakami ay men-ibaeska isnan nangpatpatey isnan babaam.

¹¹ Dengngem koma nan menseg-angan nan balod dakat wayaan isnan kabaelam nan epdas nakedngan ay mapatey.

¹² apo, maminpito ay ibaesmo isnan naisasag-en ay il-ili nan mang-iiyawanda ken sik-a.

¹³ Dat dakami ay ipogawmo et men-iyaman kami ken sik-a ay eng-enggana. Owen, dakami ay kanegmo kalnilo ya nan aap-omi is kasin enggana is komasin et daydayawenmi sik-a.