Salmo 78 - Kalin Apo Dios

¹ Dakayo ay ipogawko, dengngenyo nan kalik ya idngeyo nan isolsolok.

² Pangalig nan ibagbagak ta ipalawagko nan naligat ay maawatan ay naisolsolo id sangadom

³ ay nan dinnge ya nagtekan tako ay inbagbagan din aamam-a tako.

⁴ Adi tako bobokodan nodi ibaga tako dana isnan an-ak tako. Ibaga tako gedan isnan aap-o tako nan panakabalin nan apo ya nan kaskasdaaw ay inik-ikkana.

⁵ Nin-idya is linteg isnan Israelita ya nin-ited is bilbilin ken daida ay aap-on din si Jacob. Inbilina isdin alal-apo tako en isoloda dana isnan an-akda

⁶ tapno manggetkan nan aap-oda ay daan pay laeng naiyanak ta daida abes nan mang-isolo is dana isnan mismo ay an-akda

⁷ tapno mentalekda abes ken Apo Dios ya ta adida kalkalingkingan nan inik-ikkana nodi tongtongpalenda nan bilbilina.

⁸ Bakenda koma kan-eg din am-ada ay nasokil ya menkenteg nan toktokda ay daida ay baken makneg nan talekda ya nakapsot nan pammatida ken Apo Dios.

⁹ Nan ap-on din si Efraim et nalaingda ay menpana ngem egayda badangan nan iib-ada nodi intagtaganda nan iib-ada isdin agew ay nakigobatanda.

¹⁰ Egayda tinongpal nan nakitolagan Apo Dios ken daida ya adyanda ay mangtongpal isnan lintegna.

¹¹ Kinalingkinganda pay nan inik-ikkana ya nan kaskasdaaw ay inpap-ailana ken daida.

¹² Isnan sagang nan aamam-ada et inikkana nan kaskasdaaw isnan sakop di Soan id Egipto.

¹³ Ginedwana nan baybay et pinadaana daida et pinatakdegna nan danom ay kaneg diding issan nindaananda.

¹⁴ Isnan kag-aw et inpangpangona daida isnan kawad-ana isnan napoponok ay liboo dat isnan labi et inpangpangona daida isnan silang di apoy.

¹⁵ Pinabtakna san batbato isnan pondag et agtana daida is inomenda.

¹⁶ Pinabalana nan danom isnan batbato et paayosena ay kaneg nan ginawang.

¹⁷ Ngem olay no keg todi nan inikkana et ninbasolda kayet et inadyanda nan Kangangatowan isnan pondag.

¹⁸ Ginagalada ay nangpadas ken Apo Dios isnan ninkedawanda is makan ay bigbigawenda.

¹⁹ Ninkalida is ngawi maipanggep ken Apo Dios et kananda en, “Ay maagtan ngata Apo Dios datako is makan isnan naay pondag?

²⁰ Tet-ewa et kinogkogna nan dakkel ay bato dat menpangabala nan danom et men-ayos ay kaneg ginawang. Ngem ay maagtana ngata datako is tinapay ya kalni?”

²¹ Isonga nakaliget nan apo isdin nangdengana is dana danat dosaen nan Israelita ay ap-on din si Jacob isnan mensesese ay ligetna

²² tay adida talken siya ya adida patiyen ay maisalakana daida.

²³ Ngem olay no keg todi et binilina nan daya et kaneg matokaban

²⁴ danat ipaodan ken daida nan mana ay makan ay nagapo id daya.

²⁵ Nangan nan ipogaw is makan di aanghel ay inidyan Apo Dios ken daida ya sinmobla pay.

²⁶ Inpadagemna nan dagem ay nagapo isnan balaan di agew dat isnan panakabalina et indagemna abes nan dagem ay nagapo isnan abagatan.

²⁷ Inpaeyna nan adoado ay koyat ken daida ay kaneg nan kaad-adon di lagan isnan baybay.

²⁸ Inyekdagna nan koykoyat isnan tengan nan ninkampowanda isnan sag-en nan bawbawida.

²⁹ Nangan nan ipogaw et nabsogda tay inidyan Apo Dios nan makan ay bigbigawenda.

³⁰ Ngem olay no kankanenda nan binigawda et egayda kayet kapnek

³¹ isonga dat makaliget si Apo Dios ken daida et pateyena nan kagawisan ay mamakneg ay lalalakin di Israelita.

³² Ngem olay no inommat dana et itoltoloyda kayet ay ninbasol. Ya olay no ado ay kaskasdaaw nan inik-ikkana et egayda kayet namati.

³³ Isonga kaneg maid paay nan biyagda dapay mapalpalpaligatanda isnan katew-etew-en ay natatagowanda.

³⁴ Ngem no waday madosa ay mapatey ken daida et siya abes nan somagongan nan tap-ida ken Apo Dios dadapay menbabawi ya menlowalo ken siya.

³⁵ Owen, nanemnemda ay si Apo Dios nan salaknibda ay nan Kangangatowan ay Dios ay nangsobot ken daida.

³⁶ Ngem kampot kadi nan ibagbagada ken siya ay olay no kaneg tet-etet-ewa nan kankananda.

³⁷ Nakapsot nan pammatida et egayda tinongpal nan nakitolagan Apo Dios ken daida.

³⁸ Ngem olay no keg todi et sineg-angan kayet Apo Dios daida. Pinakawana nan basolda et egayna baybay-an daida. Namin-ado ay init-itpena nan ligetna et egayna itoloy ay mangliget ken daida.

³⁹ Ninemnemna ay apedda ipogaw ay kaneg nan dagem ay aped lomaos et kedeng.

⁴⁰ Namin-ado ay adyanda ay mangtongpal ken Apo Dios isnan pondag ya kanayon ay paseseg-angenda siya.

⁴¹ Kanayon ay padasenda nan anosna ya pinaligetda siya ay Dios di Israelita ay maid polos kangawina.

⁴² Kinalingkinganda nan panakabalina ya din nangisalakanana ken daida isnan mang-aamis ken daida

⁴³ isdin nang-ikkanana isnan kaskasdaaw isdin kawad-anda isnan sakop di Soan id Egipto.

⁴⁴ Pinabalina ay basa nan ginawang ya disik id Egipto et maid danom is mabalin ay inomenda.

⁴⁵ Nin-ipaey is adoado ay ngilaw ay nangpaligat isnan iyEgipto ya nan katokatokak ay nangdadael isnan paypayewda.

⁴⁶ Nin-ipaey is dodon ay nangkakan isnan apitda ya nangdadael isnan es-esekda.

⁴⁷ Dinadaelna nan obas isnan dalalo ya nan higosda isnan napigsa ay lemlem.

⁴⁸ Pinateyna nan bakbaka isnan dalalo ya nan kakalniloda isnan kimat.

⁴⁹ Inpapasna nan ligetna ya inpaeyna nan dadama ay ligat ken daida isdin nangibaaana isnan aanghel ay mangpaligat ken daida.

⁵⁰ Egayna initpe nan ligetna nodi binaybay-ana daida ay matey isnan sakit.

⁵¹ Pinateyna nan iyon-a ay lalaki ay an-ak nan iyEgipto. Owen, am-in ay iyon-a ay lalalaki ay an-akda.

⁵² Danat ikaan nan ipogawna id Egipto et ipangona daida isnan pondag ay kaneg nan ikkan di menpaspastol is kalnilo.

⁵³ Inpangona daida ay gawis et maid inyeg-egyatda danapay linin-eb isnan baybay san mangkedkedag ken daida.

⁵⁴ Inyeyna daida isnan pinilina ay maloweb ay daga ay mabilig ay inabakna isnan panakabalina.

⁵⁵ Pinakaana nan sigod ay mentetee isnan daga ay omayanda danat bingbingayen nan daga isnan wasdin pangbonda ay Israelita et pateeena daida isdi isnan bawbawida.

⁵⁶ Ngem olay no keg todi et pinadas ya pinaligetda kayet si Apo Dios ay Kangangatowan ya egayda tinongpal nan bilbilina.

⁵⁷ Adida katalek ya dinokoganda si Apo Dios ay kaneg din inikkan din am-ada. Adida pay polos maidine.

⁵⁸ Pinaligetda pay gapo isnan aaltarda ay sinaadda isnan bilbilig ya pinaimonda gapo isnan nangdaydayawanda isnan tinagtago isdi.

⁵⁹ Nakaliget si Apo Dios isdin nang-ilaana is dana danat laksigen nan Israelita.

⁶⁰ Binaybay-ana nan natoldaan ay pagdaydayawan id Silo ay pinilina ay menteteana isnan batawa.

⁶¹ Inpalobosna ay gowaden nan boso nan makwani en Baol di Tolag ay sinyal di kawad-ana ay mangipaila isnan kabaelana ya nan dayawna.

⁶² Dadama nan ligetna isnan ipogawna et binaybay-ana daida ay mapatey.

⁶³ Natey isnan gobat nan lalalaki et maidet nang-asawa isnan bababassangda.

⁶⁴ Natey isnan gamig nan papadida dapay maid ikakan nan binalowanda ay mang-ilemet ken daida.

⁶⁵ Dat kaneg ninkaimomonawan nan apo et kanegna nan lalaki ay pinatoled di alak

⁶⁶ danat abaken nan mangbosboso ken siya et nabainanda ay eng-enggana.

⁶⁷ Linaksigna nan polin din si Jose ay egayna pinili daida ay pangbon din si Efraim

⁶⁸ nodi nan pangbon din si Juda nan pinilina ya nan pay laeng bilig ay Sion ay sakopda nan laylaydena.

⁶⁹ Pinakenegna nan kadaydayawana isdi isnan kangatowan ay bilig. Owen, pinegnadana ay gawis nan kaidaydayawana et kanegna nan batawa ay adi kamkammid ay eng-enggana.

⁷⁰ Pinilina si David ay menbaana isnan nang-ayagana isnan pagpastolan di kakalnilo

⁷¹ ya nan koyaw ta kawanana nan ap-on din si Jacob danapay itolayan daida ay Israelita.

⁷² Et gawis nan nang-ayowanan David ken daida ya nalaing gedan ay nang-ipangpangolo ken daida.