Salmo 77 - Kalin Apo Dios

¹ Ibiyadko nan menseg-angak ken Apo Dios ya menlowalowak ta dengngena sak-en.

² Menlowalowak isnan apo isnan madadanagak. Sinlabiyan ay menlol-owalowak ngem adi kayet kayten nan nemnemko ay maliwaliw.

³ Nanemnemko si Apo Dios daket menpog-epog-es gapo isnan danagko. Ipasnekko ay mennemnemnem daket lomokey.

⁴ Adika pay omipaseyep ya dadama nan danagko et adiyak makakali.

⁵ Manemnemko nan kaageagew ay nallos

⁶ ya sinlabiyan ay mennemnemnemnemak daket dayawen sik-a. Ipasnekko ay mennemnemnem daket kanan en,

⁷ “Ay itoltoloy ngen nan apo ay manglaksig ken sak-en? Ay adina ngen kasin ipaila nan seg-angna?

⁸ Ay nammid et ngata nan adi menbalbaliw ay layadna? Ay adina et ngata tongpalen nan inkalina?

⁹ Ay kinalingkingana ngen nan kinamanagseg-angna? Ay liget ngen nan naisokat isnan kinaanosna?”

¹⁰ Makwas pay di daket kanan, “Nan mensakitan nan nemnemko et baken et kaneg din damo nan inpailan nan kabaelan nan Kangangatowan.”

¹¹ apo, nenemnemek nan inik-ikkam. Owen, nan kaskasdaaw ay inik-ikkam isdin on-onana.

¹² Ipasnekko ay mangnemnemnem isnan am-in ay inik-ikkam. Owen, nenemnemek nan kaskasdaaw ay inik-ikkam.

¹³ Apo Dios, am-in ay ikkam et maid polos kangawina. Maid dios is maiyiso ken sik-a, Apo Dios ay Dios tako.

¹⁴ Sik-a Apo Dios nan mangik-ikkan isnan kaskasdaaw ya inpailam nan panakabalinmo isnan kaipoipogaw.

¹⁵ Sinbotmo isnan panakabalinmo nan ipogawmo ay daida ay aap-on din si Jacob ya din si Jose.

¹⁶ Apo Dios, isnan nang-ilaan nan ginawang ken sik-a et inmegyat ya olay nan kaadaeman di baybay et ninpayegpeg.

¹⁷ Inyekdag nan liboo nan odan dat menkido isnan daya dapay menkimakimat.

¹⁸ Napinapigsa nan kidom ya nan batawa et masilawan isnan kimat et makibtot dat menpayegpeg nan batawa.

¹⁹ Nindaanka isnan baybay ya gindangmo nan adaem ay danom ngem adi kaila nan gatinmo.

²⁰ lnay-ayowanam nan ipogawmo ay kanegda talaken isdin nang-ipangpangowan da Moses ken Aaron ken daida.