Salmo 76 - Kalin Apo Dios

¹ Id Juda et gegetkenda si Apo Dios. Owen, nan ngadana et napateg isnan Israelita.

² Nan kad-ana et id Salem isnan bilig ay Sion ay menteteana.

³ Dinadaelna nan bomanesbes ay pana ya nan kalasag, gamig ya nan am-in ay osalen di mang-ap-apos ken siya.

⁴ Sik-a Apo Dios nan mensilsilang ya kapatgan. Kangatowanka mo nan makneg ay bilbilig.

⁵ Nagowad et nan inal-alan di natoled ay sosoldado. Maseyepda et isnan tetey et maidet makaosal isnan almasda.

⁶ Apo Dios, ay Dios din si Jacob, isnan kalim et natey nan deeyday ninsasakay ya nan kabayoda.

⁷ lyeegyat di kaipoipogaw sik-a isonga sino pay ngen nan makaitoled ay tomakdeg isnan sagangmo no makaligetka?

⁸ Ninemnemmo id daya nan ikkam ay menbanag et inmegyat nan batawa danat ikikin-e.

⁹ Owen, inkikin-ena isdin ninbanagam ay mang-isalakanam isnan maaamis isnan batawa.

¹⁰ Madayaw si Apo Dios isnan mang-abakana isnan liget di mang-ap-apos ken siya ya timbengena nan daan ay ligetda.

¹¹ Dakayo ay ipogawna, tongpalenyo nan inkaliyo isnan apo ay Diosyo. Idyan koma gedan nan il-ili ay naisasag-en nan igasingda ken siya ay napateg.

¹² Ipababana nan lastog ay mentotolay danapay paegyaten nan aali isnan batawa.