Salmo 75 - Kalin Apo Dios

¹ Apo Dios, men-iyaman kami ken sik-a. Owen, men-iyaman kami ken sik-a. Ipagpagtekmi nan kinagawismo dakamipay ibagbaga nan kaskasdaaw ay ik-ikkam.

² Kanan Apo Dios en, “Ninemnemko nan osto ay timpo ay men-okomak isnan ipogaw et osto nan ikkak isnan menbanagak.

³ Olay no menyegyeg nan batawa ya menpayegpeg nan am-in ay mentetee et paknegek kayet nan pegnadna.

⁴ Ibagak ken dakayo ay patek-ag en adi kayo menlaslastog ya is ken dakayo abes ay makedse en adi kayo kaikkaikkan.

⁵ Isaldengyo od ay menlaslastog ya isaldengyo ay aginlalaing.”

⁶ Nan kabaelan ay maipangato ya maipapigsa et baken isnan olay into isnan batawa is kagapowana

⁷ nodi ken Apo Dios ay makigad ay menbanag. Pababaena nan esa danapay ipangato nan tap-ina.

⁸ isnan liget nan apo et kanegna gegen-an nan apag ay nanapno is pinmait ay tapey danat ibokbok ta inomen am-in nan makedse isnan batawa et enggana isnan obaasna ta liknaenda nan ligetna.

⁹ Ngem sak-en pay et kanayon ay ibagbagak nan kaidayawan nan Dios din si Jacob

¹⁰ tay pamaidena nan kabaelan nan makekedse danapay papigsaen nan kabaelan di nalinteg.