Salmo 74 - Kalin Apo Dios

¹ Apo Dios, ayta dakan inadyan dakami? Ay maid patenggan nan ligetmo ken dakami ay kaneg kalnilom?

² Nemnemem koma nan nabayag ay sinbotmo ay winayaam ay ipogawmo ya nemnemem gedan nan nintet-eam id kasin ay bilig ay Sion.

³ Omalika ta ilaem nan naayday nabakas dakapay ilaen nan pagdaydayawan ken sik-a ay dinadael nan boso.

⁴ Isnan nangabakanda et men-giyawda isnan baeymo dadapay tooden nan bandilada isnan leemna ay mangipaila ay kowada kano nan templo.

⁵ Naiwakat am-in isnan templo ay kaneg nan nabalsibalsig ay kaiw

⁶ tay winasay ya minasoda am-in ay naisaad isnan templo ay olay nan naokitan ay kak-aiw ay naiyal-alti.

⁷ Pinoowanda pay nan napateg ay baeymo. Owen, inengewda nan pagdaydayawan ken sik-a.

⁸ Kananda en, “Kewasen tako am-in daida.” Pinoowanda nan am-in ay pagdagdagopan di mangdayaw ken sik-a isnan il-ilimi.

⁹ Dan maid mailami is kaskasdaaw ay ipailam ya maid pay olay esa is mamadtom is nabay-an ken dakami? Adimi pay getken no tongon di menpatengaan datona.

¹⁰ Apo Dios, kaat pay nan kabayag nan mangsaysayotanda ken sik-a? Ay maid patenggan di mang-iiyawanda isnan ngadanmo?

¹¹ Ayta dakan adi badangan dakami? Dakan od aped menpepeke?

¹² Ngem sik-a, Apo Dios, nan alimi enggana id sangadom. Sik-a pay nan mang-isalsalakan isnan ipogawmo.

¹³ Sik-a nan nanggedwa isnan baybay isnan panakabalinmo ya dinadaelmo nan kaeegyat ay nintetee isdi.

¹⁴ Sik-a nan nangmekmek isnan toktok nan kaneg bowaya ay makwani en leviatan dakat ipakan nan awakna isnan mentetee isnan pondag.

¹⁵ Sik-a nan nangipalosoy isnan balaan ya nan ginawang ya tindokmo nan men-ay-ayos ay ginawang.

¹⁶ Sik-a nan nangpawada isnan kag-aw ya nan labi ya binoliwmo nan agew ya nan bowan.

¹⁷ Sik-a pay nan nang-ippey isnan beddeng nan daga isnan batawa ya inlasinmo nan tiagew ya nan pinag-odan.

¹⁸ apo, nemnemem koma nan nangsaysayotan nan mang-ap-apos ken sik-a ya nan mang-iiyawanda isnan ngadanmo.

¹⁹ Adim koma baybay-an nan nakapsot ay ipogawmo ta adi abaken nan makedse dakami ya adim gedan kalkalingkingan dakami ay napalipaligatan.

²⁰ Nemnemem nan inkalim ken dakami tay ado nan kinadakes ay om-ommat isnan ilimi.

²¹ Adim palobosan ay mabainan nan maaamis nodi daydayawen koma nan kodo ya nababa sik-a.

²² Apo Dios, men-gonayka et ta itakdegmo nan kalintegam. Nemnemem pod nan mangsaysayotan di mang-eeya ken sik-a.

²³ Adim lelem-en koma nan ngalawngaw ya nan mentoltoloy ay men-golgolowan di mang-ap-apos ken sik-a.