Salmo 73 - Kalin Apo Dios

Nan Maikatlo ay Liblo

¹ Tet-ewa ay gawigawis si Apo Dios isnan ipogawna ay Israelita. Owen, gawis siya isnan maid polos kangawin di nemnemda.

² Ngem sak-en et gistayak maikadlis et ngannganiyak matokang

³ tay inapalak nan inilak ay gomawisan di biyag nan makedse ya nan patek-ag

⁴ tay maid ligatda ya adida masaksakit nodi napigsa ya gawisda.

⁵ Adida pay menligat ay kaneg nan tap-in di ipogaw. Owen, maid madadanaganda ay baken kaneg nan tap-ina

⁶ isonga pilmi nan patek-agda ya kanegda ibabado nan kedseda.

⁷ Asiasi nan nemnemda tay maid teken is nemnemnemenda nodi nan ngawi ay gandatda.

⁸ Sayot et kedeng nan ik-ikkanda ya ngawi nan nemnemnemenda. Lastogda ya pangpadakes isnan ib-ada nan kankananda.

⁹ Padakdakesenda si Apo Dios id daya ya nan panagkalkalida et kanegda kowa nan batawa.

¹⁰ Isonga olay nan ipogaw Apo Dios et daida nan solotenda dadapay tet-ewa patpatyen nan kankananda.

¹¹ Kananda en, “Ayke magtekan Apo Dios nan ik-ikkanmi is adi od getken nan Kangatowan nan ik-ikkan di ipogaw?”

¹² Siya di nan kaneg nan mangik-ikkan is ngawi tay olay no adida ikaskaso si Apo Dios et gawis ya somikada kayet.

¹³ Isonga waay maid obpay silbin di mangipapatiyak ay mangik-ikkan is gawis ya osto

¹⁴ tay kanayon ay mapalpaligatanak. Owen, winakgat ay wadan ligatko.

¹⁵ Ngem no kanak en maid silbin di gawis ay ik-ikkan et dadaelek nan talek di ipogawmo ken sik-a.

¹⁶ Ngem no nemnemek od nan kagawis nan biyag di mang-ik-ikkan is ngawi et mensakit nan nemnemko

¹⁷ engganay sokod sinonggepak isnan pagdayawan ken sik-a, Apo Dios, esakpay getken dadlo nan awnit ommat ken daida.

¹⁸ Tet-ewa obpay ay pakadlisem nan daanda dakat iyekdag daida isnan kadadaelanda.

¹⁹ Isnan siawyan et madadaelda et pilmi nan egyatda dadat matey.

²⁰ Nan biyagda ay managdakdakes et kaneg aped iitaw ay siawyan dat mammid tay no bomangonka, apo, et maidda et.

²¹ Isdin mensakitan nan nemnemko maipanggep isnan kagawis nan biyag di makedse et nasogatan nan liknak.

²² Kanegak nengneng ay adi makaawat ay kaneg nan animal ay adi makaaw-awat.

²³ Ngem olay no keg todiyak et egaymo binaybay-an sak-en

²⁴ nodi mangbagbagaka kayet ta osto nan ik-ikkak dat isnan mateyak et mangdawatka isnan napateg ay kad-am.

²⁵ Maid teken ay daydayawek id daya nodi sik-a et kedeng ya olay isnan naay batawa et kedengka kayet is patpatgek.

²⁶ Olay no komapsot nan nemnemko ya nan awakko ngem sik-a, Apo Dios, kayet nan mangpapigsa ken sak-en. Sik-a et kedeng nan magapgapowan nan masapolko.

²⁷ Nan mang-adi ken sik-a et maid dowadowa ay mateyda. Owen, awnitmo tet-ewa dadaelen daida ay mangdokog ken sik-a.

²⁸ Ngem ken sak-en pay et nan maisasag-enak ken sik-a nan lagsakko. Apo Dios ay kangatowan, sik-a nan makneg ay menkamkamangak daket ipagpagtek nan am-in ay ik-ikkam.