Salmo 72 - Kalin Apo Dios

¹ Apo Dios, isolowam nan alimi ta osto nan ikkana ay mentolay ken dakami. Ibingayam kad siya isnan kinalintegmo

² tapno nalinteg nan mang-itolayana isnan ipogawmo ya ilintegana nan maaamis.

³ Natalna koma nan ilimi ya masika nan paypayew isnan bilbilig.

⁴ Salakniban koma nan ali nan kodokdo ya badangana nan maliligatan danapay abaken nan men-am-amis.

⁵ Mentoltoloy koma nan mentoltolayan nan alimi ay kaneg nan kabayag di agew ya bowan id daya.

⁶ Nan kinagawis di mentotolayana et kaneg koma nan mangsibogan di odan isnan paypayew ya kaneg nan mang-opean di lagey isnan namegaan ay lota.

⁷ Wawawawada koma nan kinalinteg isnan matatagowana ya menbayag koma nan talna engganay daan nan bowan.

⁸ Awnit mentolay nan alimi isnan esay baybay et enggana isnan tapin di baybay ya isnan ginawang ay Eufrates et enggana isnan solsolin di batawa.

⁹ Nan mentetee isnan pondag ay maid osto is ilida et awnitda menpalintomeng ken siya dapay menlokbob isnan tapok nan mang-aamis ken siya.

¹⁰ Awnit omey ken siya nan aalin di Espania ya nan aali isnan tap-in di addawi ay il-ili ya omey gedan nan alin di Arabia ya Etiopia ta idyada nan datonda.

¹¹ Owen, awnit menpalintomeng nan am-in ay ali ken siya ya silbiyan am-in nan kailiili siya.

¹² Badangana nan kodo ay menseg-ang ken siya ya nan napaligatan ay maid makabadang ken daida.

¹³ Managseg-ang isnan kodo ya nakapsot danapay isalakan nan makasapol.

¹⁴ Salaknibana daida isnan mang-aamis ya mangpalpaligat ken daida. Isalakana daida tay patgena daida.

¹⁵ Matagotago koma nan ali ay eng-enggana. Maagtan koma is balitok ay magapo id Arabia ya kanayon koma ay ilol-owalowan nan ipogaw siya dadapay dayawen nan kagawisna.

¹⁶ Omadoado koma nan maapit isnan daga ya makobotan nan bilbilig is mola ay kaneg nan ikkan nan esek id Libano ay menbenga. Omado koma gedan nan ipogaw isnan il-ili ay kaneg nan kaad-adon di logam isnan om-om-a.

¹⁷ Adi makalkalingkingan koma nan ngadana nodi menbayag ay kaneg nan kabayagan di agew nan kadkadngeana. Mabadangan am-in ay il-ili gapo ken siya dadapay idawat ay bindisyonan Apo Dios siya.

¹⁸ Madaydayaw nan apo ay Dios di Israelita. Siya et kedeng nan makaikkan isnan kaskasdaaw ay banag.

¹⁹ Daydayawenyo nan napateg ay ngadana ay eng-enggana ya mapno koma nan batawa isnan dayawna. Sapay koma.

²⁰ Siya na nan manggibos isnan naayday lowalon David ay anak Jesse.