Salmo 71 - Kalin Apo Dios

¹ apo, sik-a nan menkamkamangak isonga adim koma ipalobos ay maibabainak.

² Mang-isalakanka kad isnan kinalintegmo. Dengngem kad nan dawatko ta mang-isalakanka.

³ Salidaam koma sak-en ta kanegka nan dakkel ay bato ay mabalin ay menkamangak. Owen, bilinem kad ta maisalakanak tay sik-a nan kaneg bato ay menkamkamangak.

⁴ apo ay Diosko, isalakanmo sak-en isnan panakabalin di makedse ay daida ay managdakdakes ya managbasol.

⁵ Apo Dios ay kangatowan, maid teken is namnamak nodi sik-a et kedeng tay sik-a nan nintaltalkak enggana isdin kaongak.

⁶ Enggana ay naiyanakak et sik-a nan nintaltalkak tay nangsasalaknibka engganay binmalaak ken inak isonga kanayon ay idaydayawko sik-a.

⁷ Sak-en nan pagtoladan di adoado tay sik-a nan makneg ay salaknibko

⁸ isonga kanayon ay idaydayawko sik-a dakpay ipagpagtek nan kinangatom.

⁹ Adim kad baybay-an sak-en id wani ay maam-amaak et. Owen, adim taytaynan sak-en tay nakapsotak et.

¹⁰ Mangpadakes nan mang-ap-apos ken sak-en dadapay mentotolag is ikkanda ay mangpatey ken sak-en.

¹¹ Kananda en, “Binaybay-an met laeng Apo Dios siya isonga entako kitdin depapen tay maid et mangbadang ken siya.”

¹² Apo Dios, adika koma omad-addawi ken sak-en. Ikamom kad ay mangbadang ken sak-en, Diosko.

¹³ Mabainan ya madadael koma nan mang-aamis ken sak-en. Owen, masaysayot ya maabakda koma ay mangpalpaligat ken sak-en.

¹⁴ Ngem sak-en pay et kanayon ay mentalekak ken sik-a ya am-amedko idaydayaw sik-a.

¹⁵ Kanayon ay ibagbagak nan kinalintegmo ya nan inik-ikkam ay men-isalsalakan ay olay no ado pay nan adiyak maawatan ay maipanggep ken sik-a.

¹⁶ Apo Dios ay kangatowan, idayawko nan kabaelam dakpay ipagtek ay sik-a et kedeng nan osto ay nalinteg.

¹⁷ Apo Dios, enggana isdin kaong-ongak et insolowam sak-en et enggana id wani et ibagbagak pay laeng nan kaskasdaaw ay inik-ikkam.

¹⁸ Et id wani ay naam-amaak dakpay naobanan et et adim koma baybay-an sak-en tasiyay maipagtekko nan panakabalinmo ya kabaelam isnan aan-ak ya aap-o is komasin.

¹⁹ Apo Dios, nan kinalintegmo et omdan id daya ya kaskasdaaw nan inik-ikkam. Maid polos kankanegmo, Apo Dios.

²⁰ Olay no inpalak-ammo nan danag ya ligat ken sak-en ngem awnitmo met laeng kasin papigsaen sak-en dakapay padakaen sak-en isnan kaneg kaadaeman di batawa.

²¹ Amedmo pay paadowen nan kaidayawak dakapay kasin mangliwliwaliw.

²² Awnitak ikotengteng nan pangdayawko ken sik-a ay Diosko isnan kinatet-ewam. Ikantak nan kinagawismo dakpay ikotengtengan isnan makwani en lira nan pangdayawko ken sik-a ay Dios di Israelita ay maid polos kangawina.

²³ Ibiyadko nan kantak isnan dadama ay gasingko tay sinbotmo sak-en tet-ewa.

²⁴ Kanayon ay ipagtekko nan nalinteg ay inik-ikkam tay nan mangpaligat koma ken sak-en et naibabainda ya nakolkol nan nemnemda.