Salmo 7 - Kalin Apo Dios

¹ apo ay Diosko, sik-a nan menkamkamangak. Ilisim ya isalakanmo sak-en isnan am-in ay mangkedkedag ken sak-en

² ta adida bangtebangten sak-en ay kaneg nan ikkan di layon dadapay mangpislapislak ay maid mang-isalakan ken sak-en.

³ apo ay Diosko, no waday ngawi is inikkak ay nakabasolak

⁴ ya no waday sinoksokilko is gayyemko ya no waday inakewak isnan mangaamis ken sak-en

⁵ et olay ipakedagmo sak-en isnan mangbosboso ta mangdepapda ya olay ipalobosmo ay mangpateyda dadat taynan nan awakko isnan lota.

⁶ Isnan ligetmo, apo, omalika ta sagangem nan liget nan omaamis. Bomangonka ay Diosko ta ibilinmo ta nan osto nan maikkan.

⁷ Ipadagopmo am-in nan ipogaw dakat itolayan daida id ngato.

⁸ Sik-a, apo, nan mang-okom isnan am-in ay ipogaw isonga mangbanagka isnan kinalintegko ya mangbanagka ay egayko inikkan nan ngawi tay sik-a, apo ay kangatowan, et gegetkem nan ogalik.

⁹ Sik-a ay nalinteg ay Dios ay mangtek isnan nemnem di ipogaw, pasaldengem kad nan kinangawin di managbasol dakapay pagawisen nan nalinteg ta maid iyeegyatda.

¹⁰ Si Apo Dios nan kalasagko ay mangisalsalakan isnan nalinteg ay ipogaw.

¹¹ Si Apo Dios nan nalinteg ay men-ok-okom tay kanayon ay dosaena nan makedse.

¹² No adida ibabawi nan ik-ikkanda et paliden Apo Dios nan ispadana danat isagana nan panana.

¹³ Alaena gedan nan mentadem ay osalena ya isaganana nan men-gabgabbang ay panana.

¹⁴ Nan ipogaw ay mangnemnemnem is ngawi et ik-ikkanda nan baken tet-ewa ngem mapaayda tay adi katongpal nan kaytenda.

¹⁵ Kanegna nan mensapo is bito ay pala isnan ib-ana koma dat siya met laeng nan mabitowan obpay.

¹⁶ Isonga somagong met laeng ken daida nan ngawi ay ik-ikkanda et daida mismo nan mang-okmon isnan kinakedseda.

¹⁷ Men-iyamanak isnan apo gapo isnan kinalintegna daket iday-eng nan mangdaydayawak isnan kangatowan ay apo.