Salmo 69 - Kalin Apo Dios

¹ Apo Dios, isalakanmo kad sak-en tay nay ngannganiyak malin-eb.

² Kanegak maibanek dapay maid gawis is tomakdegak. Kanegak wada isnan adaadaem ay danom ay mailinlin-eb isnan dalloyon.

³ Kinmapsotak et ay men-ad-adawag is bomadang dakpay masaek ya sinmakit pay nan matak isnan mang-an-anapak ken sik-a, Diosko.

⁴ Nan mangliliget ken sak-en is maid gapona et ad-adoda mo nan bookko. Napigsada et kaytenda ay mangpatey. Menkalida pay is baken tet-ewa maipanggep ken sak-en dadapay ipapati ay alaen nan kokwak ay kanegko inakew.

⁵ Apo Dios, gegetkem met nan kinasokilko ya nan basbasolko

⁶ ngem bakenak koma is gapona ay mabainan nan mangtalek ken sik-a, apo ay manakabalin. Adim ipalobos koma ay menkamaliyak ta bakenak is gapo ay maiyaw nan mangdaydayaw ken sik-a ay Dios di Israelita.

⁷ Tay nan pamatik ken sik-a nan gapo ay mangsaysayotda et lolomnekak is bainko.

⁸ Kaneg pay adi mangtek nan bebsatko ya nan pamilyak. Owen, kanegak teken ay ipogaw isnan aag-ik

⁹ gapo tay dadama nan sakit di nemnemko isnan adida polos mangpaayan isnan baeymo ya nan liget di ipogaw ken sik-a et sak-en nan nang-ipapasanda.

¹⁰ Menpakombabaak isnan menteptepeak ay mangan ngem siya et nan gapo ay masaysayotak

¹¹ ya no menbadowak is sako ay mangipaila isnan menbabawiyak dadat aped mangam-ammeng.

¹² Nan menlelebbeng ay amam-a isnan ili et mangtaytayoktokda dapay abes mang-idayday-eng nan botengan.

¹³ Ngem sak-en et menlowalowak ken sik-a, apo, tay id wani nan mangdengngam ken sak-en. Dengngem sak-en gapo isnan adi menbalbaliw ay layadmo ya tay tongpalem gedan nan inkalim ay mang-isalakan.

¹⁴ Mang-isalakanka isnan naay maibanekak ya adim ipalobos ay malin-ebak. Owen, salaknibam sak-en isnan mang-ap-apos ken sak-en ta mangpadakaka isnan adaadaem ay danom.

¹⁵ Adim ipalobos ay malin-ebak ya maonogak isnan kaadaeman di danom. Owen, adim ipalobos ay mateyak.

¹⁶ Apo, dengngem sak-en isnan kagawis di layadmo. Sagongem kad sak-en isnan dadama ay seg-angmo.

¹⁷ Adim koma itabonan sak-en ay baam nodi ikamom koma ay mangsongbat ken sak-en tay maliligatanak.

¹⁸ Omalika et ta mang-isalakanka. Sobtem sak-en tay makedse nan mang-aamis ken sak-en.

¹⁹ Gegetkem met nan masaysayotak, maiiyawak ya nan mangbab-ainanda ken sak-en tay iilaem am-in nan mang-ap-apos ken sak-en.

²⁰ Madagsenanak isnan mangsaysayotanda ken sak-en et maid et kabaelak. Menpabadangak koma ngem maid someg-ang ya maid pay mangliwaliw ken sak-en.

²¹ Inpakanda nan akgo ken sak-en dadapay mangpainom is soka isdin naewewak.

²² Sapay koma ta nan makikikananda isnan napateg ay ib-ada nan menbalin ay silo ken daida et siya nan mabaesanda.

²³ Makowapda koma tapno adida makaila dadapay mabakog ay eng-enggana.

²⁴ Ibkasmo nan ligetmo ken daida. Owen, ipailam nan mensesese ay ligetmo ken daida.

²⁵ Menbayen koma nan baeyda ta maid polos kasin makatee.

²⁶ Tay amedda paligaten nan pinaligatmo dadapay tayoktoken nan ligat di sinogatam.

²⁷ Adim salsaldengan ay mang-il-ila isnan menbasbasolanda ya adim ipalobos ay maiddomda isnan men-isalakanam.

²⁸ Makaskas koma nan ngadanda isnan liblo ay nailistaan di matagotago ken Apo Dios. Owen, adida koma maid-iddom isnan listaan di nalinteg.

²⁹ Ngem sak-en et napaligatak dakpay madadagsenan. Apo Dios, mangbadangka kad ta mang-isalakanka.

³⁰ Awnitak ikanta nan pangdayawko ken Apo Dios daket ipagtek nan kinangatona isnan men-iyamanak ken siya.

³¹ Wedweda na is men-gasingana mo nan baka. Owen, mo nan mentaba ay baka ay maigasgasing ken siya.

³² Isnan mang-ilaan nan maaamis is dana et gomasingda dapay pomigsa nan mangdaydayaw ken Apo Dios.

³³ Dengngen nan apo nan kaseseg-ang ya adida kalkalingkingan nan naibalod ay ipogawna.

³⁴ Dayawenyo si Apo Dios, dakayo am-in isnan daya ya nan batawa, ya nan am-in ay mentetee isnan baybay.

³⁵ Awnit isalakana nan ipogawna id Sion ya kasina esten nan il-ili id Juda dat kasin mentee nan ipogawna isdi dadat menkowa nan deey daga dadapay nanam-ay

³⁶ et awnit tawiden nan bonat di ninsilsilbi ken Apo Dios nan daga dat mentee isdi nan mangpateg ken siya.