Salmo 68 - Kalin Apo Dios

¹ Apo Dios, men-gonayka et koma ta iwakatmo nan mangbosboso ken sik-a. Lomayaw koma nan mangliliget ken sik-a.

² Kaneg nan maidageman di asok ya nan malonagan di allid isnan sag-en di apoy nan kaneg koma nan mamaidan nan mangik-ikkan is ngawi ken Apo Dios.

³ Ngem nan nalinteg et gomasing ya menlagsakda koma ken Apo Dios. Owen, sapay koma ta men-gasing ya nalagsakda.

⁴ Ikantaanyo si Apo Dios. Ikantaanyo is pangdaydayaw nan ngadana. Dayawenyo siya ay menlologan isnan liboo. apo nan ngadana. Gomasing kayo ken siya.

⁵ Si Apo Dios ay mentetee isnan napateg ay teana et siya nan salaknib di balo ya mang-ay-ayowan isnan ngoso.

⁶ Nan menseseg-ang ay ipogaw ay maeesa et itapina isnan di pamilya ya wayaana gedan nan naibalod is maid gapona. Ngem nan mang-adi ken siya et isnan namegaan ay lota nan menteanda.

⁷ Apo Dios, isdin nang-ipangpangowam isnan ipogawmo ay din ninbaatanda isnan pondag

⁸ et ninyegyeg nan batawa ya inmodan is napigsa. Owen, ninyegyeg isdin kawad-am ay Dios di Israelita isnan bilig ay Sinai.

⁹ Pinaodanmo is ado et yomam-es kasin nan namegaan ay lota ay inpatawidmo

¹⁰ dat mentee nan ipogawmo id isdi et isnan kinagawismo et pinanam-aymo nan kodokdo.

¹¹ Ninbilin nan apo et adoda ay inmey nang-ibagbaga en,

¹² “Komak-aan et nan aali ya nan sosoldadoda ay naabak.” Dapay nan bababai ay nataynan isnan bab-aey et bingbingayenda nan insaan di nangabak.

¹³ Olay no isnan kad-an di kalnilo nan naseyepanda isdin gobat ngem menkimkimatda isnan inalada ay balitok ya pilak ay al-altin di awak ay kaneg nan mensilsilengan nan payak di koyat.

¹⁴ Isdin nang-iwakatan Apo Dios ay manakabalin isnan aali et kanegda nan malonagan di ado ay dalalo ay naekdag isnan bilig ay Salmon.

¹⁵ Aye pay nan kakenkenegyo ay bilbilig id Basan dakayopay ninkangangato.

¹⁶ Ngem olay no kaneg todi nan kagawisyo ay bilig et apalanyo kayet nan bilig ay Sion tay siya nan pinilin Apo Dios ay teana. Owen, mentetee nan apo isdi ay eng-enggana.

¹⁷ Linibo ay ninkapipigsa ay logan nan mangboboweg isnan apo ay magagapo id Sinai et menpaey isnan napateg ay baeyna id Sion.

¹⁸ Omey id ngato ay ibobowegna nan ado ay balod dadat men-idaton ken siya ay olay nan nang-ap-apos ken siya ta makatee nan apo ay Dios ken daida.

¹⁹ Madaydayaw nan apo, siya ay mangpalag-an isnan awit tako ay inagew ya mangisalsalakan ken datako.

²⁰ Si Apo Dios ay Dios tako nan mangisalsalakan. Owen, siya ay kangatowan ay apo nan mangisalakan ken datako isnan tetey.

²¹ Tet-ewa ay dadaelen Apo Dios nan mang-ap-apos ken siya, daida ay adi mang-isaldeng ay menbasbasol.

²² Kanan nan apo en, “Awnitko ipasaa nan nangsape ken dakayo ay inmey id Basan, ya nan inmey gedan isnan baybay

²³ ta abakenyo daida dayot gatigatinan nan basada. Et awnit mapnek nan as-asoyo isnan awakda.”

²⁴ Apo Dios, omal-ali et nan parada ay mangpadayaw ken sik-a. Owen, ipangatoda sik-a ay Diosko ya alik, isnan songgepanda isnan napateg ay baeymo.

²⁵ Omon-on-ona nan menkankanta daet maisned nan bababassang ay mangkolkolong isnan makwani en pandereta dat nan mentangtanggoyob isnan dodokoganda.

²⁶ Madaydayaw si Apo Dios isnan madagdagopan di ipogawna. Owen, dayawenyo nan apo dakayo am-in ay aan-ak din si Jacob.

²⁷ Nan men-ipangpango et nagapo isnan pangbon din si Benjamin ay kaban-egan ay pangbon dat abes nan ado ay ap-apon ya amam-an di pangbon Juda ya nan ap-apon gedan di pangbon din da Zabulon ken Neftali.

²⁸ Apo Dios, ipailam kasin nan kabaelam ya nan panakabalinmo ay kaneg din nangbadangam ken dakami id kasin.

²⁹ Isnan templom id Jerusalem ay mang-iiyeyan nan aali isnan isagotda ken sik-a

³⁰ et dosaem nan mangbosboso ken dakami ay kan-eg nan atap ay animal. Dosaem daida engganay menpalintomengda dadapay igasing ken sik-a nan pilakda. Iwakatmo nan sanaday makigobagobat.

³¹ Dat awnit omali nan aap-apon di iyEgipto ya iyEtiopia dadat ingato nan ledledengda ay mangdayaw ken sik-a.

³² Menkanta kayo ken Apo Dios, dakayo ay kailiili isnan batawa. Iday-engyo nan pangdayawyo isnan apo.

³³ Dayawenyo siya ay mentetee isnan wawawawada ay daya ya siya ay menkali isnan kido.

³⁴ Ipagtekyo nan kabaelan Apo Dios ya nan gawis ay mentolayana isnan Israelita ya nan kabaelana gedan isnan daya.

³⁵ Tet-ewa ay kaskasdaaw si Apo Dios isnan napateg ay kad-ana. Siya ay Dios di Israelita et agtana is pigsa ya kabaelan nan ipogawna. Madaydayaw si Apo Dios.