Salmo 66 - Kalin Apo Dios

¹ Dakayo am-in isnan batawa, daydayawenyo si Apo Dios. Isnan gasingyo et ibiyadyo nan pangdayawyo.

² Ikantayo nan kinapateg nan ngadana ya ipagtekyo nan dayawna.

³ Kananyo ken Apo Dios en, “Kaskasdaaw nan ik-ikkam tay gapo isnan pilmi ay panakabalinmo et lomnek nan mang-ap-apos ken sik-a dadapay menpaypayegpeg ay menlokbob isnan sagangmo.

⁴ Am-in nan wada isnan batawa et dayawenda sik-a. Ikantada nan pangdaydayawda ken sik-a. Owen, ikantada isnan ngadanmo nan pangdayawda.”

⁵ Omali kayo ta ilaenyo nan inik-ikkan Apo Dios ay nan kaskasdaaw ay inik-ikkana isnan ipogawna.

⁶ Pinabalina nan baybay ay naango ay lota dadat mendaan ay men-gedang et dadama nan lagsakda isdin deey ay agew.

⁷ Isnan panakabalina et mentolay ay eng-enggana et iilaena nan ommat isnan kailiili. Dakayo ay mang-adi ken siya, adiyo ap-aposen siya.

⁸ Mendayaw kayo isnan Dios tako, dakayo ay kaipoipogaw. Ibiyadyo ta madnge nan mangdaydayawanyo.

⁹ Inayowanana datako ta matatago tako ya egayna inpalobos ay maisagaw tako.

¹⁰ Apo Dios, pinadapadasmo dakami. Pinaneknekam dakami ay kaneg nan mapinowan di balitok isnan apoy.

¹¹ Inpalobosmo ay madpap kami dakapay inpalobos ay madagsenan kami.

¹² Inpalobosmo pay ay gatigatinan nan mang-ap-apos dakami. Napaligatan kami pay isnan apoy ya layos. Ngem olay no keg todi et pinanam-aymo kasin dakami.

¹³ Iyalik nan mapoowan ay daton isnan templom ta tongpalek nan insapatak ken sik-a.

¹⁴ Owen, tongpalek din inkalik en idyak isdin naliligatak.

¹⁵ Idatonko isnan altar nan mapoowan ay nan mentatba ay nan kalnilo, baka ya kalding ta ngomato id daya nan asokda.

¹⁶ Dakayo am-in ay mangpateg ken Apo Dios, omali kayo ta dengngenyo ta ibagak nan inikkana pala ken sak-en.

¹⁷ Nindawatak ken siya dakpay daydayawen siya.

¹⁸ No egayak inbabawi nan basbasolko et egay nang-idnge nan apo.

¹⁹ Ngem dinngen et Apo Dios sak-en et sinongbatana nan lowalok.

²⁰ Madaydayaw si Apo Dios ay nang-idnge isnan lowalok ya egay nang-ibabawi isnan adi menbalbaliw ay layadna ken sak-en.