Salmo 65 - Kalin Apo Dios

¹ Apo Dios, lebbengna ay dayawenmi sik-a id Sion damipay tongpalen nan inkalimi ken sik-a.

² Gapo tay dengngem nan lowalo et mendawat am-in nan ipogaw ken sik-a.

³ Dadama ay mababain kami gapo isnan basbasolmi ngem pakawanem dakami.

⁴ Nagasat nan pinilim ay ipogawmo ay ipateteem isnan baeymo. Mapnek kami isnan gawis ay wada isnan baeymo ay nan bindisyon isnan templom.

⁵ Apo ay mangisalsalakan ken dakami ya namnaman di kaipoipogaw isnan nateketeken ay il-ili, kaskasdaaw ya nalinteg nan ik-ikkam ay mangsongbat isnan lowalomi.

⁶ Inpailam nan panakabalinmo isnan nangtoodam isnan bilbilig.

⁷ Pinasaldengmo nan ngengen di baybay dakapay pakin-een nan dalloyon. Olay nan men-golgolowan di ipogaw et pasaldengem gedan.

⁸ Masdaaw nan kaipoipogaw isnan kaskasdaaw ay inpap-ailam ken daida. Owen, gapo isnan kaskasdaaw ay inik-ikkam et menlagsak nan am-in isnan batawa et enggana isnan pongtona.

⁹ Ipailam nan mang-ay-ayowanam isnan batawa isnan menpaodanam ya mangpabalinam ay maloweb nan daga dakapay ponowen nan ginawang is danom. Pabgasem pay nan ap-apitenda. Siya dana nan ik-ikkam.

¹⁰ Ipaeymo nan ado ay odan isnan naalado ta yomam-es nan lota dakapay patobowen nan esek ta menlangtoda.

¹¹ Ado nan maapit isnan kinagawismo ya olay into ay omayam et maila nan bindisyonmo.

¹² Isnan pagpastolan et mentaba nan logam et kagagasing nan kaiil-an nan bilbilig.

¹³ Isonga nan pagpastolan et mamapno is talaken dapay abes nan om-om-a et menlalangto nan esek. Am-in isnan batawa et kanegda menkankanta is gasingda.