Salmo 64 - Kalin Apo Dios

¹ Apo Dios, dengngem kad nan adawagko isnan maligatak. Mang-isalakanka isnan pangeg-egyat di mang-ap-apos ken sak-en.

² Salaknibam sak-en isnan gandat di makekedse ya isnan men-golgolowan di managdakdakes.

³ Mensakit nan kankananda ay kaneg napalid ay gamig nan dilada. Kaneg pana is naitbek isnan pegaew di ipogaw nan kankananda.

⁴ Mentatabonda isnan maid polos ipogaw ta panaanda nan maid basolna. Adida omegyat ay aped mangpana ken siya.

⁵ Menbinadangda isnan ngawi ay panggepda dadapay mentotolag mo into nan mangipay-anda isnan siloda ay mangdepap koma is ipogaw tay kananda en maid mang-iila ken daida.

⁶ Mennemnemnemda is ngawi ay ikkanda dadapay kanan, “Ostoosto nan ninemnem tako ay maikkan isonga matongpal nan kayten tako.” Tet-ewa ay nasikap nan ipogaw.

⁷ Ngem golpi ay panaan Apo Dios daida et dagos ay maabakda.

⁸ Ipasagongna ken daida nan kankananda et madadaelda dat am-in ay mang-ila ken daida et menwegwegda dadapay sayoten daida.

⁹ Et awnit omegyat nan am-in ay ipogaw dadat nemnemen nan inikkan Apo Dios dadapay ipagtek en ostoosto nan inik-ikkana.

¹⁰ Gomasing nan am-in ay nalinteg gapo isnan inik-ikkan nan apo dadapay menkamang ken siya. Daydayawen nan am-in ay mangtongtongpal siya.