Salmo 63 - Kalin Apo Dios

¹ Apo Dios, sik-a nan Diosko et kakakayatko ay mang-edas ken sik-a. Mailiwak ken sik-a ay kaneg nan maewewan nan naaango ay lota is danom.

² Mailak koma sik-a isnan pagdayawan ken sik-a ta ilaek nan kabaelam ya nan dayawmo.

³ Gag-awis nan adi menbalbaliw ay layadmo mo nan biyag isonga daydayawek sik-a.

⁴ Engganay matatagowak et daydayawek sik-a dakpay ingato nan ledengko isnan menlowalowak.

⁵ Mamapnekak ay kanegak ninlagsak dakpay menkanta is kagagasing ay mangdaydayaw ken sik-a.

⁶ Isnan mangipopodanak et nemnemnemek sik-a. Sinlabiyan ay nemnemnemek sik-a

⁷ tay sik-a nan kanayon ay kabadangko. Ikantak nan gasingko isnan mangsalsalaknibam ken sak-en.

⁸ Popomketak ken sik-a ta mangbadbadangka isnan kabaelam.

⁹ Ngem nan mangkayat ay mangpatey ken sak-en et awnitda omey isnan kad-an di natnatey.

¹⁰ Awnitda mapatey isnan gobat dat isdan di atap ay animal daida.

¹¹ Nan pay ali et awnit men-gasgasing ken Apo Dios. Am-in nan mensapata isnan ngadan Apo Dios et men-gasgasingda gedan tay maipaginek nan kampotan.