Salmo 62 - Kalin Apo Dios

¹ Si Apo Dios et kedeng nan taltalkek tay siya nan mangisalakan ken sak-en.

² Siya et kedeng nan kamangko ya mangisalakan ken sak-en. Siya nan salaknibko isonga adiyak pilmi ay madanagan.

³ Ay itoltoloyyo ay mang-aamis ken sak-en dapay natotokangak ay kaneg nan natotokang ay alad?

⁴ Kaytenyo et kedeng ay ipababa sak-en isnan saadko. Kaykaytenyo od nan baken tet-ewa tay gawis nan kankananyo ngem isnan nemnemyo et mangbab-aos kayo.

⁵ Si Apo Dios et kedeng nan taltalkek tay siya nan namnamak.

⁶ Siya et kedeng nan kamangko ya mangisalakan ken sak-en. Siya nan salaknibko isonga adiyak pilmi ay madanagan.

⁷ Nan kaisalakanak ya kaidayawak et magapo ken Apo Dios tay siya nan napigsa ay mangsalsalaknib ya menkamkamangak.

⁸ Dakayo ay ipogawko, si Apo Dios nan kanayon ay talkenyo koma. Ibagayo ken siya nan madadagsenanyo tay siya nan kamang tako.

⁹ Nan ipogaw et kaneg sinkasip-oy ay anges ay maid dagsena tay nangato man wenno nababa et palipalisoda ay maid silbida isnan pangiilaan Apo Dios tay adida katalek.

¹⁰ Adiyo kanan en bomaknang kayo isnan men-ak-akewanyo ya mang-eg-egyatanyo isnan ipogaw. Baken od koma nan kinabaknangyo is taltalkenyo.

¹¹ Baken namnaminsan nan nangdengak ken Apo Dios ay nangnangwani en siya et kedeng nan kagapowan di panakabalin

¹² ya maid gedan patenggan nan layadna. Owen, sik-a, apo, nan mismo ay mangidya isnan ganaben di tonggal esay ipogaw sigon isnan inik-ikkana.