Salmo 61 - Kalin Apo Dios

¹ Apo Dios, inaagmo kad nan adawagko. Dengngem koma nan lowalok.

² Olay no into nan kad-ak ay addawi man et men-adawagak kayet ken sik-a. Isnan kamaid namnamak et sik-a nan men-adawagak. Iwanedmo sak-en ay menkamang ken sik-a ay kaneg nan menlinged isnan dakkel ay bato

³ tay sik-a nan napigsa ay kamangko ya salaknibko isnan mang-ap-apos ken sak-en.

⁴ Kagagasingko ay mentetee isnan kad-am ay enggana ta menkamangak ken sik-a.

⁵ Apo Dios, dinngem et nan insapatak dakat ipatawid ken sak-en nan kalebbengan di mangdaydayaw ken sik-a.

⁶ Paan-andowem kad nan biyag di ali ta mabayag nan matatagowana.

⁷ Apo Dios, mentolay siya koma ay eng-enggana ay tatakdowem. Nan layadmo ya nan kinamatalekmo koma nan mangsalsalaknib ken siya.

⁸ Daket kanayon ay ikanta nan pangdaydayawko dakpay tongpalen ay winakgat nan insapatak ken sik-a.