Salmo 60 - Kalin Apo Dios

¹ Apo Dios, inadyam dakami dakat abaken dakami. Nakaligetka ngem id wani et isagongmo koma dakami ken sik-a.

² Pinapayegpegmo nan ilimi ay kaneg ninyegyeg dat mang-ak nan lota. Estem kad nan dadaelna tay daan ay men-giwgiwed.

³ Pilmi ay pinaligatmo dakami ay ipogawmo. Maidapdapig kami et ay kan-eg kami naboteng.

⁴ Nin-ipangatoka is sinyal tapno getken nan mangpateg ken sik-a no sino nan menkamanganda isnan gobat.

⁵ Dengngem koma nan lowalomi dakat bomadang isnan kabaelam tapno maisalakan nan ipogaw ay laylaydem.

⁶ Isnan kinadiosna et kinwanin Apo. Dios en, “Men-gasingak ay mangbingbingay isnan dagan di Sikem daket iwalas nan tanap di Succot isnan ipogawko.

⁷ Kowak nan daga ay Galaad ya nan daga ay Manases. Et daida id Efraim nan kanegko panakakalogong tay daida nan salaknibko. Ya daida id Juda nan kanegko panakabael tay magapo ken daida nan mang-ipangpango isnan ipogawko.

⁸ Ngem nan daga ay Moab et kanegna nan nalogit ay danom tay atiatik nan pategna ken sak-en. Nan daga pay abes ay Edom et awnitko kowa gedan. Dat isnan mangabakak id Filisteo et awnitak menlagsak.”

⁹ Apo Dios, sino pay nan mang-iyey ken sak-en isnan ili ay nababaked nan liliwesena? Sino nan mang-ipango ken sak-en id Edom?

¹⁰ Ay baken kad sik-a ay mang-adyan ken dakami ya mang-adi ay makkey isnan sosoldadomi?

¹¹ Badangam kad dakami ay mangsape isnan mangbosboso ken dakami tay maid silbin nan badang di ipogaw.

¹² Mangabak kami isnan kawad-an Apo Dios ken dakami. Siya nan mang-ipangabak ken dakami isnan mangbosboso ken dakami.