Salmo 59 - Kalin Apo Dios

¹ Apo Dios, mang-isalakanka isnan mang-ap-apos ya mangsalaknibka isnan manggobgobatanda ken sak-en.

² Owen, mang-isalakanka ken daida ay makedse ya mangsalaknibka isnan mangpateyanda koma ken sak-en.

³ Ilaem pod et naay ay mangseseedda ta mangpateyda. Naay mang-ambon nan makekedse ay aamam-a dapay maid met inikkak is ngawi wenno nakabasolak ken daida, apo.

⁴ Maid met basolko is gapona ay ikakamoda ay omey mensagana ay manggobat ken sak-en. apo, men-gonayka et adi ta ilaem nan ikkanda ken sak-en ta bomadangka.

⁵ Apo Dios ay manakabalin, sik-a ay Dios gedan di Israelita, ibangonmo et ta dosaem nan adi mamati ken sik-a. Adim segseg-angan daida ay makedse ya managbasol.

⁶ Somagongda isnan labi dadat mendad-aan isnan ili ay kan-egda naanganga ay aso.

⁷ Dengngem nan pangeg-egyatda et kaneg gamig ay mensogat nan kalida tay kananda od en olay ket maid teken is makadnge ken daida.

⁸ Ngem apedmo ammengan daida, apo. Owen, ammengam ay mangselat isnan am-in ay adi mamati.

⁹ Sik-a ay pamigsak, sesed-ek sik-a tay sik-a, Apo Dios, nan kamangko.

¹⁰ Laylayden nan Diosko sak-en et omali siya ken sak-en. Awnitna ipalobos ay menlagsakak isnan naabakan di bosok.

¹¹ Ngem apo ay salaknibmi, adim kad pateyen daida ay dagos nodi iwalasmo ya dadaelem daida isnan pigsam ta adi kalingkingan nan ipogawko nan inommat.

¹² Gapo tay managbasolda isnan topekda ya ngawi nan am-in ay kankananda et madpapda koma isnan menpapangatowanda. Ya gapo isnan menbab-aosanda ya baken tet-ewa ay kankananda

¹³ et dadaelem daida isnan ligetmo. Owen, aminem daida. Dat siya nan manggetkan nan am-in ay si Apo Dios nan mentolay id Israel ya itolayana gedan nan am-in ay sakop nan batawa.

¹⁴ Somagongda isnan labi dadat mendad-aan isnan ili ay kan-egda naanganga ay aso.

¹⁵ Men-an-anapda is kanenda dadapay mendangoo no adi omanay nan maanapanda.

¹⁶ Ngem sak-en pay et iday-engko nan kabaelam. Winakgat ay iday-engko nan adi menbalbaliw ay layadmo tay sik-a nan kamangko ya salidak isnan maligatak.

¹⁷ Sik-a ay pamigsak, iday-engko nan dayawko ken sik-a tay sik-a, Apo Dios, nan kamangko ya Diosko ay managlayad.