Salmo 58 - Kalin Apo Dios

¹ Dakayo ay mentotolay, ay nalinteg kad nan ik-ikkanyo? Ay nan mangbanaganyo isnan kaipoipogaw et ostoosto et en?

² Baken met-a, tay kedeng nan ngawi is nenemnemenyo ya nan menpasaksakit isnan batawa nan ik-ikkanyo et kedeng.

³ Nan managdakdakes et ngawi nan ik-ikkanda isnan matatagowanda. Menkampokampotda enggana isdin naiyanakanda.

⁴ Kaneg kedet di oweg nan kinakedseda. Adi mabalin ay paamowen daida tay totowengenda ay kaneg nan mentoltol ay oweg ay adi mapaamo.

⁵ Adida idnge nan maibagbaga ay kaneg nan mentoltol ay oweg ay adi mapaamo ay olay no nalaing ay mensalsalamangka nan mangpadas.

⁶ Apo Dios, kaanem nan pigsada ay kaneg nan magpongan nan saong di layon.

⁷ Mamaidda koma ay kaneg nan matdokan di danom ya mapitpitda koma ay kaneg nan mapitpitan di logam ay magatigatinan.

⁸ Mamaidda koma ay kaneg nan nasoltopan ay ket-an ya kaneg nan maiyanak ay nanatey ay egay polos nang-ila isnan pat-a.

⁹ Golpi ay pammiden Apo Dios daida ay paspaspas pay mo nan pomoosan di kandilo isnan menbidbidang ay apoy.

¹⁰ Dat gomasing nan nalinteg ay ipogaw isnan mangilaanda ay maibaesda isnan mateyan di managbasol dadat gatigatinan nan basada.

¹¹ Dat kanan nan ipogaw en, “Tet-ewa ay magon-gonaan nan nalinteg. Tet-ewa ay wada si Apo Dios ay mangbanag isnan batawa.”