Salmo 57 - Kalin Apo Dios

¹ Apo Dios, mangseg-angka tay sik-a nan menkamangak. Menpasakokowak isnan payakmo engganay makwas nan mapalpaligatak.

² Men-adawagak ken Apo Dios ay kangangatowan. Owen, ken Apo Dios ay mangipatongpal isnan kaytena pala ken sak-en.

³ Id daya et ipaiyalina nan badangna gapo isnan layad ya kinamatalekna. Isalakana sak-en isnan kampotan ay mangdadadael ken sak-en.

⁴ Naliliwesak isnan makekedse ay kan-egda layon ay men-isda is ipogaw. Kan-eg balbeg ya pana nan bab-ada ya kaneg mentalaladem ay gamig nan kalida.

⁵ Apo Dios, maipangatoka koma mo nan daya, ya maipaila koma nan kaidaydayawam isnan batawa.

⁶ Nin-ipakat nan mang-aamis ken sak-en is silo ay mangsilo koma ken sak-en et pilmi nan egyatko. Ninkaotda pay is abot isnan daanko ngem daida met laeng nan ninpaayan nan sinapoda.

⁷ Apo Dios, adi menbalbaliw nan talekko ken sik-a. Owen, adi menbalbaliw nan talekko. Iday-engko nan pangdaydayawko ken sik-a.

⁸ Dayawek sik-a isnan men-amay ay kanta ay makotengtengan. Dat isnan tan-o et magidowak ta dayawek sik-a.

⁹ apo, ipagtekko nan men-iyamanak ken sik-a isnan kaipoipogaw ya daydayawek sik-a isnan kailiili.

¹⁰ Tay nan adi menbalbaliw ay layadmo et nangatngato mo nan daya ya nan kinamatalekmo et omdan isnan liboo.

¹¹ Apo Dios, maipangatoka koma mo nan daya, ya maipaila koma nan kaidaydayawam isnan batawa.