Salmo 56 - Kalin Apo Dios

¹ Seg-angam kad sak-en, Apo Dios, tay makedkedagak. Kanayon ay mangpalpaligatda.

² Maid saldeng di mangkedkedaganda ken sak-en tay adoadoda ay mangbosboso ken sak-en.

³ 0 apo ay kangangatowan, isnan omegyatak et sik-a nan mentalkak.

⁴ Daydayawek si Apo Dios isnan inkalina dakpay taltalken siya isonga maid iyegyatko. Ngan od pay di ikkan di aped ipogaw ken sak-en?

⁵ Kanayon ay mangpalpaligat nan mang-ap-apos ken sak-en. Mennemnemnemda is ikkanda ay mangdadael.

⁶ Mentotyada ay maid mangiila dadapay sisiimen am-in ay ik-ikkak tay kaytenda ay mangpatey koma.

⁷ Apo Dios, dosaem daida isnan kinakedseda. Isnan ligetmo et abakem nan naayda ay ipogaw.

⁸ Gegetkem nan pilmi ay madadanagak. Wada ken sik-a nan listaan di nin-ag-agaak tay nailista met isnan liblom ta adim kalingkingan.

⁹ Isnan mendawatak ken sik-a et mensanod nan manggobgobat ken sak-en. Gegetkek ay ommatna tay wada si Apo Dios ken sak-en.

¹⁰ Daydayawek si Apo Dios isnan inkalina. Owen, madaydayaw nan apo isnan kankanana.

¹¹ Si Apo Dios nan taltalkek isonga maid iyegyatko. Ngan od pay di ikkan di aped ipogaw ken sak-en?

¹² Apo Dios, tongpalek nan inkalik ken sik-a. Idatonko ken sik-a nan igasingko isnan men-iyamanak

¹³ tay insalakanmo sak-en isnan tetey ya egaymo inpalobos nan maabakak ta solsolotek sik-a, apo, isnan dagan di matmatago.