Salmo 55 - Kalin Apo Dios

¹ Apo Dios, dengngem kad nan lowalok. Adim totowengen nan dawatko.

² Inaagmo kad sak-en tay kinmapsotak et isnan madadanagak.

³ Mensakit nan nemnemko isnan pangeg-egyat nan mang-ap-apos ken sak-en dakpay madanagan isnan mang-aamisanda ay makedse tay pilmi ay kaiingeda ya kaliligetda sak-en.

⁴ Dadama nan sakit di nemnemko ya omeegyatak ay matey.

⁵ Menpayepayegpegak isnan omeegyatak et linmokeyak et pay.

⁶ Kanak et pay en kanegak koma nan kalapati ta mapayakanak ta tomayawak isnan men-illengak.

⁷ Owen, tomayawak koma isnan addaaddawi ta menteeak et isnan pondag.

⁸ Pomaspas koma nan omayak isnan men-idongak ta maiyaddawiyak isnan napigsa ay lemlem.

⁹ apo, ngawngawem nan makedse dakapay teknen nan kalida tapno adida menkinaawatan tay mail-ila isnan ili ay mensasaspeda dadapay mensisinongbat.

¹⁰ Inagew ya linabi ay mendaanda ay mangliwes isnan ili et ado nan ngawi ya kinekedse ay ommat.

¹¹ Kinadakes nan wada isnan am-in ay solina et ado nan maam-amis ya masiksikapan isdi.

¹² No koma nan mang-aamis nan mang-iiyaw ken sak-en et waay mabalin ay iitpek. No koma nan kasapek gedan nan mang-ap-apos et mabalin ay itabonak.

¹³ Ngem sik-a met obpay ay gayyemko ay kakakakadwak ya gayyegayyemko nan aped mang-ap-apos ken sak-en.

¹⁴ Gawis met nan ninkadkadwaanta id kasin dadapay adi mensis-iyan isnan mendaydayawanta isnan baey Apo Dios.

¹⁵ Bigla koma nan mateyanda ay mang-aamis ken sak-en ta kanegda maonog isnan kad-an di natnatey ay olay no egay inomdan nan osto ay timpoda tay kinadakes nan wada ken daida.

¹⁶ Ngem sak-en pay et si Apo Dios nan menpabadangak et mang-isalakan nan apo.

¹⁷ Linabi ya winakgat ya olay isnan kag-aw et menlol-owalowak dakpay ibiyad nan dawatko et dengngena sak-en.

¹⁸ Isalakana sak-en et maid ommat ken sak-en isnan makigobgobatak ay olay no adoado nan mang-ap-apos ken sak-en.

¹⁹ Si Apo Dios ay mentotolay enggana id kasin et awnitna dengngen sak-en danat paligaten daida tay adiyanda ay menbaliw ya adida iyegyat siya.

²⁰ San sigod ay kadkadwak et sapsapeena nan gagayyemna. Adina tongtongpalen nan makitoltolagana.

²¹ Mendange nan menkalkaliyana ay kaneg nalanaan dapay kadi ngawi nan wada isnan nemnemna. Makaawis nan kalina ay kaneg nalanaan nan dilana ngem makasakit ay kaneg nan mentadem ay ispada.

²² Dakayo ay wada nan ligatyo, ipasoblatyo nan ligatyo isnan apo et papigsaena dakayo tay adina ipalobos ay maabak nan nalinteg ay ipogaw.

²³ Ngem sik-a, Apo Dios, et awnitmo ipaey nan menpatpatey ya kampotan isnan maikaobanda esapay magedwa nan matatagowanda. Ngem sak-en pay et mentaltalekak ken sik-a.