Salmo 53 - Kalin Apo Dios

¹ Nan menkenteg nan toktokna et nemnemena en, “Ayke od waday Dios?” Am-inda et adida katalek tay ngawi am-in nan ik-ikkanda. Maid polos mang-ikkan is gawis.

² Oosdongan Apo Dios id daya nan kaipoipogaw ta ilaena no waday olay esa koma is masilib ya no waday olay esa is mangdaydayaw ken siya.

³ Ngem teken nan an-anapenda isonga ninbalinda ay adi mapaay ay ipogaw. Maid polos mang-ikkan is gawis. Owen, maid polos olay esa.

⁴ Kanan Apo Dios en, “Daida ay managbasol, ay adida kaisolowan aya? Akewanda nan ipogawko is menkatagoda ay bakenak is mendawatanda.”

⁵ Ngem awnit pilmi nan egyatda. Maid kankaneg nan egyatda tay abaken Apo Dios daida et maiwakat nan toltolangda. Mabainanda tay binaybay-an Apo Dios daida.

⁶ Sapay koma ta omdan ay dagos nan magapo id Sion ay mangisalakan isnan Israelita. Awnit pilmi nan gasing di Israelita isnan kasin mangpasikaan Apo Dios ken daida.