Salmo 52 - Kalin Apo Dios

¹ Sik-a ay nangato nan saadna, dakan it-ek nan kinangawim? Kanayon ay men-et-etekka dapay pilmi nan kangawiyam isnan pangiil-an Apo Dios.

² Kaykaytem ay menkalkali is makadadael isnan ib-am. Nan dilam et kanegna nan mentadem ay gipan ay makasogat.

³ Mas laylaydem od nan ngawi mo nan gawis ya nan menkamkampot mo nan menkaliyam is tet-ewa.

⁴ Laylaydem nan kali ay makasogat, sik-a ay kampotan.

⁵ Ngem dosaen Apo Dios sik-a ay eng-enggana. Gabotena sik-a ta kaanena sik-a isnan menteteam et mamaidka isnan dagan di matmatago.

⁶ Awnit boyaen nan nalinteg ay ipogaw sik-a et omeegyatda ngem ammengandaka dadapay kanan en,

⁷ “Ilaenyo pod nan naay ipogaw ay baken si Apo Dios is kamangna nodi nintalek od isnan kinabaknangna ya pinmigsa gapo isnan kinamakedsena.”

⁸ Ngem sak-en pay et kanegak nan kaiw di olibo ay tomotobo isnan kad-an nan apo. Nan adi menbalbaliw ay layadna nan mentaltalkak id wani et eng-enggana.

⁹ Apo Dios, daydayawek sik-a ay eng-enggana gapo isnan inikkam. Ipangatok sik-a isnan ipogawmo daket ipagtek nan kinagawismo.