Salmo 51 - Kalin Apo Dios

¹ Apo Dios, seg-angam kad sak-en gapo isnan adi menbalbaliw ay layadmo. Gapo isnan dadama ay seg-angmo et kaskasem nan basbasolko.

² Owasam nan am-in ay kinangawik ta madalosanak ay osto isnan basbasolko.

³ Tay getkek ay nailaw-anak et kanayon ay nemnemnemek nan basbasolko.

⁴ Ken sik-a nan nakabasolak et kedeng. Owen, kedkedeng ken sik-a is ninbasolak tay inikkak nan kanam en basol isonga osto nan mang-ipabasolam ken sak-en ya nalinteg nan mangbanagam.

⁵ Sibabasolak enggana isdin naiyanakak. Owen, engganay binmalaak ken inak et nakabasolak et.

⁶ Nan kakakayatmo et nan tet-ewa ay panagnemnemnem isonga isolom kad ken sak-en nan osto ay silib.

⁷ Kaanem nan basbasolko tapno madalosanak. Owasam sak-en ta mapolpolawak mo nan kapes.

⁸ Pagasingem ya palagsakem kad kasin sak-en ta olay no pilmi ay nangpaligatka et men-gasgasingak kasin.

⁹ Adim kad ikaskaso nan basbasolko nodi kaskasem am-in ay kinadakesko.

¹⁰ Apo Dios, boliwem kad nan nadalos ay nemnem ken sak-en ta menbalinak ay managtongpal.

¹¹ Adim kad pakak-aanen sak-en isnan kad-am ya adim kak-aanen ken sak-en nan Ispiritom ay maid polos kangawina.

¹² Isagongmo kasin ken sak-en nan gasing di mang-isalsalakanam dakat pasingpeten sak-en ta tongtongpalek sik-a.

¹³ Daket isolo nan maipanggep ken sik-a isnan managbasol ta somagongda ken sik-a.

¹⁴ 0 Apo Dios ay mang-isalsalakan ken sak-en, mang-isalakanka isnan tetey daket magasgasingan ay mang-ipagpagtek isnan kinalintegmo.

¹⁵ apo, badangam sak-en ay menkali ta dayawek sik-a ay osto.

¹⁶ Baken met nan aped animal ay maidatdaton is laydem ta siya nan idatonko koma tay adika magasingan isnan daton ay mapoowan

¹⁷ nodi nan daton ay mangpagasing ken sik-a, Apo Dios, et nan kinapakombaba tay adim iiyawen nan nababa ya managbabawi.

¹⁸ Apo Dios, seg-angam kad nan ipogawmo id Sion ta somagongda ken sik-a tapno kanegmo tooden kasin nan natokang ay alad nan Jerusalem.

¹⁹ Tay no siya nan maikkan na et awnitka magasingan isnan osto ay maidaton ken sik-a dakat layden et nan idatonda ay mapoowan ay baka isnan altarmo.