Salmo 50 - Kalin Apo Dios

¹ Menkali nan apo ay Dios ay manakabalin et ayagana nan am-in isnan batawa ay menlogi isnan balaan di agew et enggana isnan kaonogana.

² Magapo id Sion ay mabegebegew ay ili nan silang Apo Dios.

³ Omal-ali nan Dios tako et adina et igiginek. Wada nan omon-on-ona ay apoy ay menbidbidang isnan sagangna ya napigsa ay lemlem isnan liliwesena.

⁴ Ayagana nan wada id daya ya isnan batawa ay mangila isnan mangbanagana isnan ipogawna.

⁵ Kanana en, “Dagopenyo nan kananyo en matalek ay ipogawko, ay nakitolag kano ken sak-en isnan nin-idatdatonanda.”

⁶ Ipagpagtek nan wada id daya ay nalinteg si Apo Dios tay siya mismo nan menbanag.

⁷ Kanan Apo Dios en, “Dengngenyo nan kanak, dakayo ay ipogawko, isnan mang-idalomak ken dakayo ay Israelita tay sak-en si Apo Dios ay Diosyo.

⁸ Baken nan idatdatonyo ya nan mapop-oowan ay igasgasingyo is gapo ay mang-idalomak ken dakayo.

⁹ Adiyak masapo nan baka ya kalding ay talakenyo

¹⁰ tay kowak ngalod nan am-in ay animal isnan pagpag ya nan linibo ay baka isnan bilbilig.

¹¹ Kowak gedan am-in ay mentaytayaw ya siyangna gedan isnan am-in ay wada isnan ilit ay matmatago.

¹² Et no maowatak et adiyak masapol di ibaga ken dakayo tay kowak ngalod nan batawa ya nan am-in ay mentetee.

¹³ Aykeak od mensidsida is baka wenno omin-inom is basan di kalding?

¹⁴ Isonga nan iyamanyo koma nan idatonyo ken sak-en ay Dios dayopay tongpalen nan inkaliyo ken sak-en ay Kangangatowan.

¹⁵ Dat no waday ligat et sak-en nan mendawatanyo et awnitak isalakan dakayo dakayot mangdaydayaw.”

¹⁶ Ngem isnan makedse et kanan Apo Dios ken daida en, “Ngan di kalebbenganyo ay mangibagbaga isnan bilbilinko ya makibibiyang isnan tolagko.

¹⁷ Adyanyo ay bagbagaak dakayo ya adiyo ikaskaso nan kankanak ken dakayo.

¹⁸ No ilaenyo nan mangakew dakayot maiddom ken daida dakayopay makikadkadwa isnan makikamkamolala.

¹⁹ Nan ngawi nan kaykaytenyo ay kankanan ya adiyo polos isaldeng ay men-al-allilaw.

²⁰ Kanayon ay taytayoktokenyo nan besatyo ay olay no anak inayo gedan.

²¹ Inik-ikkanyo am-in dana ngem in-gigiginekko isonga waay kananyo en kanegko dakayo ngem id wani et idalomko dakayo ay mang-ipaila is ken dakayo nan am-in ay inik-ikkanyo.

²² Idngeyo na dakayo ay adi mang-ikaskaso ken sak-en ay Apo Dios tay no adiyo et dadaelek dakayo et maid makaisalakan ken dakayo.

²³ Nan mangdayawanyo ken sak-en nan tet-ewa ay daton ay mangpateg ken sak-en et isaganayo nan mang-isalakanak ken dakayo.”