Salmo 5 - Kalin Apo Dios

¹ Dengngem kad nan kankanak, apo. Dengngem nan pog-esko.

² Inaagmo nan men-adawagak is badangmo, sik-a ay Alik ya Diosko, tay nan menlowalowak et ken sik-a, apo.

³ Isnan tan-o et dengngem nan kanak tay isnan wakgat et mendawatak daket sed-en nan songbatmo.

⁴ Sik-a nan Dios ay adi magasingan isnan ngawi ay maik-ikkan ya adi mabalin ay makitee nan managbasol ken sik-a.

⁵ Adim layden nan patek-ag ay ipogaw ya am-in ay managbasol et kaliligetmo.

⁶ Dosaem am-in ay menkamkampot ya kaiingem nan pomapatey ya men-al-allilaw.

⁷ Ngem gapo isnan pilmi ay seg-angmo et makasgepak isnan baeymo. Mendayawak isnan templom ya menlokbobak ay mangpateg ken sik-a.

⁸ Iwanedmo sak-en ay mang-ikkan isnan laydem, apo, ta adiyak maabak isnan mangsansaneb ken sak-en. Padawsem kad nan solotek ay daanmo.

⁹ Adi polos katalek nan kankanan nan mang-ap-apos tay mendadadael et kedeng nan ik-ikkanda. Mendange nan kalida ngem makaallilaw nan kankananda.

¹⁰ Apo Dios, okomem damet dosaen daida ya adim ipalobos ay mangabakda isnan ngawi ay panggepda. Pakaanem daida gapo isnan ado ay basolda ya isnan mangdokoganda ken sik-a.

¹¹ Ngem nan am-in ay menkamang ken sik-a et menlagsakda. Mabalin ay kanayon ay menday-engda gapo is gasingda. Ibaliwam nan manglaylayad ken sik-a ta tet-ewa ay men-gasgasingda gapo ken sik-a.

¹² Sik-a, apo, nan mangbindisyon isnan mangtongtongpal ken sik-a ya nan layadmo et kaneg kalasag ay mangsalsalida ken daida.