Salmo 49 - Kalin Apo Dios

¹ Dakayo ay kaipoipogaw, dengngenyo nan kanak. Idngeyo na, dakayo am-in isnan batawa

² ay olay no nangato wenno nababa kayo ya baknang man wenno kodo.

³ Pangwanin di masilib nan kanak ta maawatanyo nan naoneg ay pangwani.

⁴ Nemnemek nan esay pangwani daket ikotengteng nan kayatna ay kanan.

⁵ Daken aped omegyat isnan timpon di ligat ya isnan mangliwesan di dakes ay mang-ap-apos ken sak-en?

⁶ Kinabaknangda nan taltalkenda ay mangbadang ken daida dadapay men-et-etek tay ado nan kokwada.

⁷ Maid ipogaw is makasobot isnan biyag di ib-ana wenno bayadan nan biyagna ken Apo Dios.

⁸ Tay nan biyag di ipogaw et pilmi ay nangina et adi omanay nan kabaelana ay mangbayad

⁹ tapno mabalin ay matago ay eng-enggana. ya ta adi kadondonot nan awakna isnan pantiong.

¹⁰ Getken nan ipogaw ay olay nan masilib et mateyda ya olay gedan nan makedse ya nan maid nemnemda. Am-in dadi et mateyda met laeng et taynanda nan kinabaknangda isnan tap-in di ipogaw.

¹¹ Nan pantiongda nan menteteteteanda et isdi nan baeyda ay eng-enggana ay olay inngadanda isnan dagdagada nan ngadanda.

¹² Baken nan kinangaton di ipogaw is mang-iyaddawi ken siya isnan tetey tay kaneg isnan animal ay matey gedan.

¹³ Siya na nan menbanagan nan mentaltalek isnan aw-awakda ya nan pasolotda ay mang-ab-aboloy isnan kankananda.

¹⁴ Nakaldogda ay kaneg nan kakalnilo ngem isnan tetey nan nakaldoganda et kanen di tetey daida. Awnit abaken nan nalinteg daida et madonot nan awakda isnan pantiong ay addawi isnan menbegew ay baeyda.

¹⁵ Ngem sak-en pay et awnit mangsobot si Apo Dios isnan kabaelan di tetey tay tet-ewa ay ayagana sak-en.

¹⁶ Isonga adiyo apalan nan ipogaw ay bomaknang ya no omadoado nan kokwana

¹⁷ tay maid polos ikawitna isnan mateyana. Adina maikawit nan kinabaknangna isnan pantiongna.

¹⁸ Olay no mamapnek nan ipogaw isnan biyagna id wani, tay tet-ewa ay idaydayaw di ipogaw nan kawadan am-in di masapolna,

¹⁹ et awnit gedan matey ay kaneg din alal-apona et maitapi ken daida isnan teanda ay menbolinget ay eng-enggana.

²⁰ Nan nangato ay ipogaw ay adi makaaw-awat et kanegna nan animal ay matey gedan.