Salmo 48 - Kalin Apo Dios

¹ Napatepateg nan apo et lebbengna ay madayaw siya isnan napateg ay bilig isnan ilin nan Dios tako.

² Menbegew ya atakdag nan bilig ay Sion ya siya gedan nan kagagasing di kaipoipogaw. Siya na nan ilin di kangangatowan ay Ali.

³ Mamagtek isnan mamakneg ay bab-aey issan ili ay si Apo Dios nan osto ay kamangda.

⁴ Isnan nadagopan di aali ay omey manggobat id Sion

⁵ et nasdaawda issan nang-ilaanda ay makneg san ili. Inmegyatda dadat tomagtag.

⁶ Ninpayepayegpegda is egyatda ya danagda id isdi ay kaneg nan ikkan di menpasikal

⁷ ya kaneg nan wada isnan bapol ay iyan-anod di napigsa ay lemlem.

⁸ Dindinngemi nan inik-ikkan nan apo ay manakabalin et id wani inilami et daida isnan ilin nan Dios tako ay apo ay manakabalin tay pinakenegna nan ili ay eng-enggana.

⁹ apo, isnan templom et nemnemnemenmi nan adi menbalbaliw ay layadmo.

¹⁰ Apo Dios, madmadnge nan ngadanmo isnan am-in ay solin di batawa ya daydayawen nan kaipoipogaw sik-a isnan am-in ay il-ili tay nalinteg nan am-in ay ik-ikkam.

¹¹ Men-gasing koma nan ipogaw id Jerusalem ya nan il-ilin di Juda tay nalinteg nan ik-ikkam.

¹² Liwesenyo nan ili ay Sion ta ilaenyo ay gawis nan kakenegna dayot bilangen nan natonggidan ay baey ay tean di gowaldiya.

¹³ Ilaenyo nan makneg ay aladna dayot ilaen ay gawis nan toktokodna tapno osto nan ibagayo isnan aap-oyo is kasin.

¹⁴ Tay si Apo Dios ay naay et siya nan Dios tako. Siya nan mangit-itdo ken datako ay eng-enggana.