Salmo 47 - Kalin Apo Dios

¹ Am-in kayo ay ipogaw, mentipokpok kayo isnan lagsakyo. Ibiyadyo nan gasingyo isnan mangdayawanyo ken Apo Dios

² tay nan apo ay kangangatowan et maiyegyat ya siya nan kapatgan ay mentotolay isnan batawa.

³ Pinangabakna datako isnan kaipoipogaw ya pinatolayna datako isnan kailiili.

⁴ Pinilina nan naay gawis ay daga ay tawiden tako ay nan daga ay kagagasing din si Jacob ay laylayden nan apo.

⁵ Nginmato kasin si Apo Dios id daya isnan mang-ibogbogawan tako isnan lagsak tako ya isnan napigsa ay tanggoyob.

⁶ Iday-engyo nan pangdayawyo ken Apo Dios. Owen, menkanta kayo ay mangdayaw isnan Ali tako.

⁷ Tay si Apo Dios nan Ali isnan am-in isnan batawa isonga ikantayo nan maibagay ay dayaw ken siya.

⁸ Mentolay si Apo Dios isnan kailiili ay tomotokdo isnan napateg ay tokdowana.

⁹ Maamong am-in nan aap-apon di kailiili ta maitapida isnan ipogaw nan Dios din si Abraham tay am-in ay kabaelan di aap-apon di batawa et si Apo Dios nan kagapowana isonga dadama ay maipangato siya.