Salmo 46 - Kalin Apo Dios

¹ Si Apo Dios nan kamang ya pamigsa tako. Kanayon ay nakasagana ay bomadang isnan maligatan.

² Isonga adi tako omeg-egyat olay no menyegyeg ya no magday isnan baybay nan bilbilig

³ ya olay no pomigsa nan dalloyon isnan baybay ay mangwedwed isnan bilbilig.

⁴ Wada nan ginawang ay mang-ipagawis isnan ilin Apo Dios ay ili ay napateg ay mentetean nan Kangangatowan.

⁵ Adi polos magog-owad nan ilin Apo Dios tay olay isnan tan-o et wada siya ay mangsalsalaknib.

⁶ Makibtot nan kailiili dapay maabak nan mentotolay ken daida. Men-ibiyad Apo Dios nan kalina et kaneg mangpos nan batawa.

⁷ Wada ken datako nan apo ay manakabalin tay si Apo Dios ay Dios din si Jacob nan kamang tako.

⁸ Omali kayo ta ilaenyo nan inik-ikkan nan apo, ay nan kaskasdaaw ay inikkana isnan batawa.

⁹ Pasaldengena nan gobat isnan batawa. Gopongena nan pana ya dadaelena nan balbeg danapay poowan nan kalasag.

¹⁰ Kanana en, “Isaldengyo dakayot nemnemen ay sak-en si Apo Dios. Maipangatowak isnan kailiili. Owen, maipangatowak isnan batawa.”

¹¹ Wada ken datako nan apo ay manakabalin tay si Apo Dios ay Dios din si Jacob nan kamang tako.