Salmo 45 - Kalin Apo Dios

Day-eng di kasal pala isnan ali

¹ Ninemnemko nan gawigawis et siya nan naay kanta ay iday-engko pala isnan ali. Nakasaganaak ay menday-eng ay kaneg nan nalaing ay domaday-eng.

² Kagowapowanka isnan lalalaki isnan batawa ya menlamnin nan kalim tay binindisyonan Apo Dios sik-a ay eng-enggana.

³ Isaganam nan almasmo, sik-a ay napateg ay ali ay manakabalin ya nadayaw,

⁴ dat isnan kinangatom et omeyka mangabak ta salaknibam nan kinalinteg ya kinatet-ewa. Isnan pigsam et maila nan katataa ay ik-ikkam.

⁵ Naagidan nan panam et mentodokda nan poson di manggobat ken sik-a ya menpakombaba nan kailiili ken sik-a.

⁶ Nan mentolayam ay inidyan Apo Dios ken sik-a et maid patenggana. Nan ik-ikkam ay mentolay et ostoosto.

⁷ Laylaydem nan gawis dakapay adyan nan ngawi et siya nan gapo ay pinilin Apo Dios ay Diosmo sik-a danapay pagasingen sik-a mo nan iib-am.

⁸ Menbango nan badbadom is songsong di mica, aloe ya kasia ya wada nan menkotengteng ay mangpagasing ken sik-a isnan naaltiyan ay baeymo ay ali.

⁹ Bababai ay aan-ak di aali nan tap-in di mensilsilbi ken sik-a. Isnan kanawanmo et siya nan kad-an nan awnitmo asawaen ay ninbabado is gawigawis ay naal-altiyan is balitok.

¹⁰ Sik-a ay asawaen nan ali, dengngem pod nan kanak. Kalingkingam et nan kakabagyam ya nan ipogawmo.

¹¹ Gapo isnan begewmo et kakakayat nan ali sik-a et siya et nan apom isonga patgem siya.

¹² Sagotan di iTiro sik-a ya padasen pay nan babaknang ay manggon-od isnan badangmo.

¹³ Ayet di begew nan prinsesa ay asawaen nan ali isnan songgepana tay naal-altiyan is balitok nan badona.

¹⁴ Menkimkimat nan ibabadona isnan mang-ipangowanda ken siya isnan ali ay bobowegen di bababassang.

¹⁵ Men-gasgasingda ya menlaglagsakda dadapay songgep isnan baey nan all.

¹⁶ Awnit ado nan an-akmo ay mangtawid isnan kinapateg din alal-apom et awnitmo patolayen daida isnan kailiili isnan batawa.

¹⁷ Nan day-engko nan awnit kanemnemneman di ngadanmo ay eng-enggana isonga awnit daydayawen di kaipoipogaw sik-a ay eng-enggana.