Salmo 44 - Kalin Apo Dios

¹ Apo Dios, dindinngemi nan kaskasdaaw ay inik-ikkam id kasin isdin timpon din alal-apomi tay sinodsodok din am-ami ken dakami.

² Inbagada nan maipanggep din inikkam ay nang-ipakaan isnan tapin di ipogaw isnan naay ili dakapay ipatee nan ipogawmo ay din alal-apomi isnan dagada. Owen, pinammidmo nan tap-in di ipogaw dakapay panam-ayen nan ipogawmo.

³ Baken nan pigsa ya toled di ipogawmo is gapo ay inabakda nan naay ili nodi gapo isnan kabaelam ya nan pigsam ya isnan kawad-am ay nangbadbadang ken daida tay laylaydem daida.

⁴ Sik-a nan Alik ya Diosko ay mang-ipangpangabak isnan ipogawmo.

⁵ Isnan badangmo nan gapo ay maabakmi nan manggobat ken dakami et nan kawad-am ken dakami nan gapo ay naabak nan nang-aamis ken dakami.

⁶ Baken nan almasko is mentaltalkak tay adi makaisalakan

⁷ nodi sik-a nan mang-isalakan ken dakami isnan omaamis dakapay pabainan nan mangliliget ken dakami.

⁸ Apo Dios, kankanayon ay idaydayawmi sik-a ya maid patenggan di men-iyamananmi ken sik-a.

⁹ Ngem id wani et binaybay-am dakami ya inpalobosmo ay maibabain kami isnan gobat tay adim et kakadwaan dakami.

¹⁰ Inpalobosmo pay ay patagtagen nan kagobatmi dakami dadapay gowaden nan kokwami.

¹¹ Inpalobosmo ay matadtad nan tap-imi ay kaneg kalnilo dakat iwakat dakami isnan kailiili.

¹² Nalaka nan nang-ilakowam isnan ipogawmo ay olay maid galansiyam tay maid paaymi ken sik-a.

¹³ Inilan nan naisasag-en ay nan inikkam ken dakami dadat saysayoten ya am-ammengan dakami.

¹⁴ Ninbalin kami ay mais-islat isnan kaipoipogaw dadapay iwegweg nan oloda ay mangsaysayot ken dakami.

¹⁵ Kanayon ay mabab-ainanak et malonagak et pay is bainko

¹⁶ gapo isnan mang-iyaiyawanda, mangliligetanda, ya menkalikaliyan nan mang-ap-apos ken sak-en.

¹⁷ Inommat kayet am-in dana ken dakami ay olay no egaymi kalkalingkingan sik-a wenno dinokdokogan nan nakitolagam ken dakami.

¹⁸ Egaymi dinokdokogan sik-a nodi tinongtongpalmi nan bilbilinmo.

¹⁹ Dapay kayet binaybay-am dakami isnan kad-an di atap ay animal dadapay tinaynan dakami isnan kad-an di menbolinget.

²⁰ No insaldengmi ay mangdaydayaw ken sik-a ay Diosmi ta nindaydayaw kami isnan sinangdidios

²¹ et nagtekam met laeng tay gegetkem nan wada isnan nemnemmi.

²² Ngem gapo ken sik-a apo, et mapatpatey kami. Inbilangda dakami ay kaneg kakalnilo is maisagana ay mapalti.

²³ Magidoka kad, apo. Ayta od dakan maseseyep? Gidoka. Adim baybay-an dakami ay eng-enggana.

²⁴ Ayta aya dakan itabtabonan dakami? Adim kad kalkalingkingan nan mapalpaligatanmi ya maaamisanmi.

²⁵ Naipababa kami isnan nabaibainanmi ay kaneg kami menpodpodan isnan lota.

²⁶ Bomangonka ta badangam dakami. Sobtem kad dakami gapo isnan adi menbalbaliw ay Iayadmo.