Salmo 43 - Kalin Apo Dios

¹ Apo Dios, ipagtekmo ay nalintegak dakat itakdegan sak-en isnan ngawi ay ipogaw. Isalakanmo sak-en isnan kampotan ya mamakedse

² tay sik-a, Apo Dios nan menkamkamangak. Ngem ayta dakan binaybay-an sak-en? Ayta dan maid saldeng nan mangpalpaligatan nan mang-ap-apos ken sak-en?

³ Ipaalim nan silawmo ya nan kinatet-ewam ta iwanedda sak-en. Ipangoda koma sak-en id Sion ay napateg ay biligmo ya isnan baeymo.

⁴ Awnitak omey isnan altarmo, Diosko, sik-a ay Dios ay mangidya ken sak-en is gasing ya lagsak, daket menkanta ya menkotengteng ay mangdayaw ken sik-a, apo ay Diosko.

⁵ Ayta ngen aya daken menseseg-ang ya ayta daken aped madadanagan? Masapol ay si Apo Dios nan kad-an di namnamak tay getkek ay awnitak kasin dayawen siya, siya ay mang-isalsalakan ya Diosko.