Salmo 42 - Kalin Apo Dios

Nan Maikadwa ay Liblo

¹ Apo Dios, kaneg isnan mangbigawan di naewew ay ogsa is danom nan kaneg nan mailiwak ken sik-a.

² Mailiwak ken sik-a, sik-a ay matatago ay Dios. Tongona pay, Apo Dios, nan makaeyak isnan kad-am?

³ Kag-aw ya labi ay men-ag-agaak ay kanegko kankanen nan agak. Kanayon ay sos-ooten nan mang-ap-apos ken sak-en en, “Ay into pay od nan Diosmo?”

⁴ Menseseg-angak no manemnemko nan inom-ommat isdin nallos. Isdin makmakkeyak isnan om-ommey isnan baey Apo Dios et kanayon ay ipangolok daida ay mang-ikankanta ya mang-ibogbogaw isnan dayawda ken Apo Dios.

⁵ Ayta ngen aya daken menseseg-ang ya ayta daken aped madadanagan? Masapol ay si Apo Dios nan kad-an di namnamak tay getkek ay awnitak kasin dayawen siya, siya ay mang-isalsalakan ya Diosko.

⁶ Dadama ay menseseg-ang ya mensasadotak isonga ninemnemko sik-a isnan naay sag-en nan ginawang ay Jordan, ya sag-en gedan di bilig ay Hermon ya bilig ay Mizar ay kad-ak id wani.

⁷ Kanegak naanod isnan ligat ay inyalim tay kanegda napigsa ay dalloyon ay manggoygoyod ken sak-en.

⁸ Ngem inagew ay ipailan kayet nan apo nan adi menbalbaliw ay layadna ya linabi ay ikantak nan mangdaydayawak ken siya dakpay menlowalo ken Apo Dios ay mangtatago ken sak-en.

⁹ Kanak pay ken Apo Dios ay menkamkamangak en, “Dakan kalingkingan sak-en? Ayta dan maid saldeng nan mangpalpaligatan nan mang-ap-apos ken sak-en?”

¹⁰ Malonagak isnan mangbaibainan nan mang-aamis ken sak-en dadapay kanayon ay sos-ooten en, “Ay into pay od nan Diosmo?”

¹¹ Ayta ngen aya daken menseseg-ang ya ayta daken aped madadanagan? Masapol ay si Apo Dios nan kad-an di namnamak tay getkek ay awnitak kasin dayawen siya, siya ay mang-isalsalakan ya Diosko.