Salmo 41 - Kalin Apo Dios

¹ Nagasat nan ipogaw ay mangseg-ang isnan maid kabaelanda. Isalakan nan apo siya isnan maligatana.

² Salakniban nan apo siya danat paan-andowen nan biyagna. Panam-ayena siya isnan naay daga et adina ipalobos ay abaken di men-ap-apos siya.

³ Ayowanan pay nan apo siya no masakit danapay pagawisen.

⁴ Ninlowalowak en, “apo, ninbasolak ken sik-a, ngem mangseg-angka kad ta pagawisem nan sakitko.”

⁵ Dapay nan mang-ap-apos ken sak-en et kananda isnan kinakedseda en, “Tongona ngen nan kateyana ta makalingkingan nan ngadana?”

⁶ Olay no wada nan omal-ali ay mangbisita ken sak-en ngem baken tet-ewa kadi nan ibagbagada ken sak-en nodi men-an-anapda is mangtaytayoktokanda ken sak-en dadat omey sodsodoken isnan kaipoipogaw.

⁷ Am-in ay mangliliget ken sak-en et men-inagasaasda ya kasasakit nan kankananda ken sak-en.

⁸ Kananda en, “Nadagsen nan sakitna gapo isnan basolna od isonga naipket isnan podanan et adi et makabangon.”

⁹ Olay nan tinalekko ay gayyegayyemko ay nakikkikan ken sak-en et dinokogana gedan sak-en.

¹⁰ Ngem, apo, maseg-angka ta pagawisem sak-en tapno makaibaesak ken daida.

¹¹ Isnan keg todi et magtekak ay kagagasingmo sak-en tay adi makaabak nan mang-ap-apos ken sak-en.

¹² Pinapigsam sak-en gapo isnan kinalintegko dakat ipatee sak-en ay eng-enggana isnan kad-am.

¹³ Madaydayaw nan apo ay Dios di Israelita. Owen, madaydayaw ay eng-enggana. Sapay koma.