Salmo 40 - Kalin Apo Dios

¹ Inanosak ay nangseed isnan badang nan apo danat dengngen nan mensegseg-angak.

² Inpadakana sak-en isnan adaem ay nalolomotan ay abot ay naloloyek nan pitekna danat papatongen sak-en isnan batbato dat mangpedeng ta adiyak maikadlis.

³ Insolowana sak-en ay menkanta is balo ay kanta ay mangdayaw isnan Dios tako. Awnit ado nan mang-ila dadat patgen dadapay talken nan apo.

⁴ Nagasat nan ipogaw ay nan apo nan mentalkana ay baken nan anito is taltalkena wenno nan sinangdidios is daydayawena.

⁵ apo ay Diosko, adoado nan kaskasdaaw ay inik-ikkam. Kaskasdaaw ya ado nan kaytem ay ikkan pala ken dakami. Maid polos makaiso ken sik-a. Olay no padasek ay mangibaga koma ngem gapo isnan kaadona et adiyak maibaga am-in.

⁶ Baken nan basan di naibon-ong wenno nan tapin di mait-ited ken sik-a is kaykayatmo. Baken gedan nan kapop-oowan di animal is men-gasingam nodi nan kayatmo et ta idngek sik-a.

^7-8 Isonga kanak en, “apo ay Diosko, naayak ay mangtongpal isnan kayatmo ay kaneg nan nakwani isnan inpasolatmo id kasin ay maipanggep ken sak-en. Et adiyak kalkalingkingan nan lintegmo.”

⁹ apo, ipagtekko nan kinalinteg isnan madagopan nan ipogawmo. Gegetkem ay adiyak isalsaldeng ay mangibagbaga.

¹⁰ Egayko binokodan nan kinalintegmo nodi ibagbagak nan kinamatalekmo ya nan men-isalsalakanam. Owen, egayko binokodan nan adi menbalbaliw ay layadmo ya nan kinatet-ewam isnan madagopan di ipogawmo.

¹¹ apo, adim kad saldengan ay mangsegseg-ang ken sak-en. Nan layadmo ya kinatet-ewam nan mangsalsalaknib koma ken sak-en

¹² tay adoado nan ligatko ya inomdan et nan basolko isnan toktokko isonga adiyak et makaila. Ad-adoda et pay mo nan bookko isonga komapsotak.

¹³ apo, maseg-angka kad ta isalakanmo sak-en. Ikamom koma ay omali ta mangbadangka, apo.

¹⁴ Nan mangkayat ay mangpatey ken sak-en et maibabainda koma ya makolkol nan nemnemda. Daida ay mangkayat ay mangdadael ken sak-en et maseyatanda koma dadapay mabaibainan.

¹⁵ Siyangna gedan isnan mangsaysayot ken sak-en ta mabainanda koma isnan maabakanda.

¹⁶ Ngem am-in ay mangpateg ken sik-a et gomasing ya menlagsak koma ya am-in ay mangpaay isnan mang-isalakanam ken daida et kanayon ay kananda koma en, “Madaydayaw nan apo.”

¹⁷ Sak-en pay et olay no kodowak ya kaseseg-angak ngem adi kayet kalkalingkingan nan apo sak-en. Sik-a, Diosko, nan mangbadang ya mang-isalsalakan ken sak-en. Adika koma menpatapatay nodi omalika et.