Salmo 4 - Kalin Apo Dios

¹ O Dios ay salaknibko, inaagmo kad nan lowalok ta mangbadangka. Isdin naligatak et nangbadangka et id wani seg-angam kasin sak-en ta dengngem koma nan lowalok.

² Dakayo ay ipogaw, ay kaat pay nan kabayag nan mang-ibabainanyo isnan dayawko? Tongona pay di mang-isaldenganyo ay mangdaydayaw isnan sinangdidios ya mangkaykaytanyo isnan baken tet-ewa?

³ Nenemnemenyo ay nan apo et pinilina nan nalinteg ay men-ipogawna. Mo mendawatak ken siya et dengngena sak-en.

⁴ No nakaliget kayo dayot pabaewen nan nemnemyo ta adi kayo bomasol. No ipopodanyo isnan kamayo dakayot nemnemen ay gawis na ta isaldengyo ay menbasol.

⁵ Igasingyo isnan apo nan lebbengna ay maigasing dayopay talken siya.

⁶ Ado nan menlowalo ay mangwani en, “An-anayam koma, apo, nan bindisyonmo ken dakami ya seg-angam dakami.”

⁷ Ngem ken sak-en et nan lagsak ay inyalim et dakdak-e mo nan awnit lagsak nan ado nan pageyda ya tapeyda.

⁸ Isnan mang-ipodanak et maseyepak ay maid egyat tay sik-a, apo, nan mangbantay ta maid om-ommat.