Salmo 39 - Kalin Apo Dios

¹ Ninemnemko en, “Makailak nan ik-ikkak ta adiyak menbasol isnan kankanak. Ilikepko et nan topekko no wada nan makedse ay mendedengnge.”

² Ngem isnan nangigiginkak ay maid kinkinwanik is olay gawis et inmam-amed nan dagsen di liknak.

³ Dadama ay napnowanak et et isnan mangnemnemnemak et amed domagsen nan liknak. Adiyak et makaitpe ay adi menkali daket kanan en,

⁴ “apo, ipanemnemmo kad ken sak-en nan kaap-aptik di biyagko ya nan kabayag di matatagowak tapno getkek ay osto nan kap-aptik di biyagko.

⁵ Sinkadangan et kedeng nan biyagko ay inpabolodmo, ya kaneg maid paayna isnan pangiilaam. Owen, sinkasip-oy et kedeng nan biyag di ipogaw.

⁶ Kaneg alin-ew et kedeng nan ipogaw. Maid kapaayan di mensonisoniyana tay ipakatna ay men-ol-olnong is kinabaknang dapay adina getken no sino nan awnit mennam-ay isnan inol-olnongna.

⁷ Isonga id wani, apo, et maid teken nodi sik-a et kedeng nan kad-an di namnamak.

⁸ Isalakanmo sak-en isnan am-in ay basbasolko ta adi mangsaysayot nan nasokil ay ipogaw.

⁹ In-giginekko ay egayak ninlilili tay sik-a nan nang-ipakalo ken sak-en.

¹⁰ Adim et dosdosaen sak-en tay naay komapsotak ay kanegka nangsaplisaplit.

¹¹ No dosaem nan ipogaw ay ninbasol et madadael nan napateg ken siya ay kaneg nan ikkan di ataming isnan galot. Owen, tet-ewa ay sinkasip-oy et kedeng nan biyag di ipogaw.

¹² apo, inaagmo kad nan lowalok ta dengngem nan dawatko. Adim koma totowengen isnan men-ad-adawagak ken sik-a. Kanegak sangaili et kedeng isnan batawa. Owen, sangailiyak et kedeng id isna ay kaneg din alal-apok.

¹³ Sagongem sak-en ta gomasingak kasin esakpay matey et mamaidak et.”