Salmo 38 - Kalin Apo Dios

¹ apo, adika kad mangsagsagiit isnan lomigtam. Adika kad mangdosdosa gapo is ligetmo.

² Tay nasogatak ay kanegmo pinanaan sak-en ya kanegmo itatamed sak-en.

³ Pinaot-otmo nan awakko gapo isnan ligetmo ya adiyak makatalna gapo isnan basolko.

⁴ Maabakak isnan kadagsen di basolko tay pilmi ay mendagsen et adiyak makaawit.

⁵ Madondonot et dapay pomteg nan sogatko gapo isnan kinasokilko.

⁶ Nabakogak pay is sakit ya kanayonak ay menseseg-ang.

⁷ Pilmi nan poos di awakko et men-ot-ot am-in ay toltolangko.

⁸ Kinmapsokapsotak et maid et pigsak daket men-adawag gapo is sakit di nemnemko.

⁹ apo, gegetkem am-in ay kakakayatko ya dedengngem nan menpogpog-esak.

¹⁰ Menpaypayaspas nan baak et naay kinmapsotak. Linomnek et pay nan matak.

¹¹ Gapo isnan sogatko et kadodogis nan gagayyemko ya nan sasagogongko sak-en ya olay nan ag-ik et omaddawida ken sak-en.

¹² Nan deeyda pay mang-ap-apos ken sak-en et kayatda ay mangpatey. Nan wada nan panggepda ay mangdadael ken sak-en et padakesenda sak-en dadapay mentolag is ikkanda ken sak-en.

¹³ Ngem totowengek ay kanegak adi makadnge ya oomelek ay kanegak adi makakali ken daida.

¹⁴ Owen, kanegak ipogaw ay adi makadnge isonga adiyak makasongbat

¹⁵ tay sesed-ek sik-a, apo. Sik-a, apo ay Diosko, nan somongbat pala ken sak-en.

¹⁶ Tay dinawatko en, “Adim koma ipalobos ay men-gasingda isnan maligatak ya kananda en gag-awisda mo sak-en no waday mailaw-anak.”

¹⁷ Tay ngannganiyak mailaw-an isonga kanayon ay men-ikalowak.

¹⁸ Ipodnok et nan kinadakesko ya ibabawik nan basolko.

¹⁹ Ngem wadada pay laeng nan mang-ap-apos ken sak-en dadapay napigsa. Inmadoda nan mangliliget ken sak-en ay maid gapona.

²⁰ Nan mangsobalit is ngawi isnan gawis et mangtayotayoktokda tay itaktakdegak nan osto.

²¹ apo, adim koma baybay-an sak-en ya adika omaaddawi ken sak-en, Diosko.

²² apo ay mang-isalsalakan, ikamom kad ay mangbadang ken sak-en.