Salmo 37 - Kalin Apo Dios

¹ Adika madanagan gapo isnan makedse. Adim ap-apalan daida ay mang-ikkan is ngawi.

² Tay kanegda nan logam ay nalaka ay mammid ya kaneg mola ay nalaka ay matey.

³ Ngem sik-a pay et talkem nan apo dakapay ikkan nan gawis. No siya di nan ikkam et menteeka isnan naay daga ay maid om-ommat ken sik-a.

⁴ Magasinganka koma isnan apo et awnitna tongpalen nan namnamaem ay maikkan.

⁵ Italekmo nan biyagmo isnan apo. No talkem siya et badangana sik-a

⁶ danapay ipaila nan kinagawismo ay kaneg nan bomalaan di agew isnan tan-o ya maiila nan kinalintegmo ay kaneg isnan kag-aw ay maiila nan am-in.

⁷ Inaagmo nan apo dakapay anosan ay mangseed isnan badangna. Adika madanagan ken daida isnan gomawisan nan biyagda isnan mangipakatanda isnan ngawi ay panggepda.

⁸ Adika makalkaliget ya maing-inge. Adika gedan mendandanag tay ngawi et kedeng nan mentongpalanda.

⁹ Tay nan mangik-ikkan is ngawi et maipakaanda ngem nan mentalek isnan apo et awnitda tawiden nan daga.

¹⁰ Isnan siawyan et mamaid nan mangik-ikkan is ngawi et olay no anaanapem daida et adim et madas-an isnan sigod ay teanda.

¹¹ Ngem nan mangipapababa isnan nemnemda et awnitda tawiden nan daga dadapay menlamlamnin.

¹² Nan makedse et mennemnemnemda is ngawi isnan nalinteg dadapay men-gegege is ligetda ken siya.

¹³ Ngem ammengan nan apo daida ay makedse tay getkena ay nganngani et nan mabanaganda.

¹⁴ Isaganan nan makedse nan ispadada dadapay ipana nan panada ay mangponta koma isnan kodokdo ya nan kaseseg-ang. Owen, ta pateyenda koma nan nalinteg ay ipogaw.

¹⁵ Ngem awnit nan posoda mismo nan doy-oken nan ispadada ya magpong nan panada.

¹⁶ Napatpateg nan at-atik ay kokwan di nalinteg mo nan am-in ay kinabaknang di makedse

¹⁷ tay makaan nan pigsan di makedse dapay papigsaen nan apo nan nalinteg ay ipogaw.

¹⁸ Ayowanan nan apo nan mangtongtongpal ken siya ya nan tawidda et maid patenggana.

¹⁹ Adida maabak isnan timpon di ligat ya adida kaaw-awanan isnan bitil.

²⁰ Ngem nan makedse et awnitda matey. Owen, nan mang-ap-apos isnan apo et kanegda nan sabsabong ay nalaka ay malaylay wenno nan asok ay dagos ay mammid.

²¹ Nan makedse et men-otangda dadat adi bayadan ngem nan nalinteg et manag-itedda.

²² Nan binindisyonan nan apo et daida nan mangtawid isnan daga ngem nan binaosna et awnitda mapakaan.

²³ Nan apo nan mang-iwanwaned isnan ik-ikkan di gawis ay ipogaw ya magasgasingan nan apo ken siya isnan ik-ikkana.

²⁴ Olay no maisogto et adi maisagaw tay tetengelen nan apo siya.

²⁵ Naam-amaak et ngem enggana isdin kaongak et maid pay inil-ilak is nalinteg ay ipogaw is binaybay-an nan apo wenno is an-akda is menlimlimos

²⁶ nodi managseg-ang ya managpaotangda et mabindisyonan nan an-akda.

²⁷ Taynam nan ngawi ta nan gawis nan ikkam et awnit mentetee ay eng-enggana nan an-akmo ya ap-om isnan daga

²⁸ tay laylayden nan apo nan kinaosto et adina baybay-an nan matalek ay ipogawna. Salsalaknibana daida ay eng-enggana ngem nan an-ak di makedse et awnitda maipakaan.

²⁹ Nan nalinteg ay ipogaw et awnitda tawiden nan daga et awnitda menlamlamnin isdi ay eng-enggana.

³⁰ Nan nalinteg ay ipogaw et masilib isonga gawis am-in ay kankanana.

³¹ Adina pay kalkalingkingan nan linteg di Diosna et adi maisagsagaw.

³² Nan makedse et sisiimenda nan nalinteg tay kaytenda ay pateyen daida

³³ ngem adi baybay-an nan apo daida isnan panakabalin di ngawi ya isnan mabanaganda et ipagtekna ay nalintegda.

³⁴ Mentalekka koma isnan apo dakapay tongpalen nan bilina et awnitna patgen sik-a danat ipatawid nan daga ken sik-a ya awnitmo ilaen nan madosaan di makedse.

³⁵ Inilak nan kabaelan di makedse ay kaneg nan kakeneg di dakkel ya men-akbong ay kaiw

³⁶ ngem idi ilaek kasin daet nammid isdi et olay no anaanapek et adiyak et madas-an isnan sigod ay teana.

³⁷ Ilaem pod nan ipogaw ay gawis ya nalinteg et maoolnosda ay eng-enggana.

³⁸ Ngem am-in ay managbasol et madosada et maid et menbanaganda.

³⁹ Nan apo nan mangisalakan isnan nalinteg ay ipogaw et siya nan menkamkamanganda isnan maligatanda.

⁴⁰ Owen, badangana ya isalakana daida isnan makedse tay taltalkenda siya.