Salmo 36 - Kalin Apo Dios

¹ Mentetee nan basol isnan nemnem di makedse et adina polos patgen si Apo Dios.

² Ipapangatona nan awakna isonga kanana en waay adi kagtekan nan basolna ay olay no dadama.

³ Kampot ya ngawi pay am-in nan kankanana dapay adina et ik-ikkan nan nalinteg ya gawis.

⁴ No ipopodana et nan ngawi nan nemnemnemena et kedeng ay adina polos kayten ay taynan nan ngawi.

⁵ apo, dadama nan layadmo et omdan id daya ya nan kinamatalekmo et tomokad isnan liboo.

⁶ Makneg nan kinalintegmo ay kaneg nan kakeneg di bilbilig. Nan kinasilib di panagbanbanagmo et kaneg nan kaad-adaem di baybay. Sik-a, apo, nan mangtatago isnan ipogaw ya am-in ay menkiwkiwi.

⁷ Napatepateg, 0 Dios, nan adi menbalbaliw ay layadmo isonga nan kaipoipogaw et sik-a nan menkamkamanganda ay kaneg nan menkamangan di kin-oy isnan inada.

⁸ Mamapnekda isnan makan ay magapgapo ken sik-a dakapay painomen daida isnan ginawang di kagawismo

⁹ tay sik-a nan magapgapowan di am-in ay biyag et gapo isnan silawmo et pomat-a nan nemnemmi.

¹⁰ apo, itoltoloymo koma ay laylayden nan mangpateg ken sik-a ya id-idyam koma gedan nan gawis isnan nalinteg.

¹¹ Adim ipalobos ay mangsape nan men-et-etek. Owen, adim ipalobos ay mang-ipakaanda ay makedse.

¹² Naabak dadlo nan mangik-ikkan is ngawi et adida et makabangon kasin.