Salmo 35 - Kalin Apo Dios

¹ apo, itakdegam kad sak-en isnan mangbosboso ken sak-en. Owen, gobatem nan manggobgobat ken sak-en.

² Alaem nan kalasagmo ta salidaam sak-en.

³ Isaganam nan balbegmo ta seyatam nan mangkedkedag ken sak-en. Kanam kad ken sak-en en, “Sak-en nan salaknibmo.”

⁴ Maibabain koma nan mangkayat ay mangpatey ken sak-en. Nan wada nan panggepda ay mangdadael ken sak-en et maipasagongda koma dadapay mabaibainan.

⁵ Kanegda koma nan taep ay itayaw di dagem isnan mangkedagan nan anghel nan apo ken daida.

⁶ Menbolinget ya menkadlis koma nan daanda isnan mangkedkedagan nan anghel nan apo ken daida

⁷ tay maid inikkak ken daida dadapay nin-ipakat is silo ta masilowanak koma ya ninkaobda pay is bito ta mangbitoda koma.

⁸ Isonga isnan adida getgetken et madadaelda koma. Daida nan masilowan koma isnan silo ay sinapoda ya mabitowanda koma gedan isnan bitoda.

⁹ Daket menlagsak gapo isnan inikkan nan apo ya men-gasingak isnan nang-isalakanana ken sak-en.

¹⁰ Daket kanan isnan am-in ay kababalinko en, “Maid polos kankaneg di kinagawismo, apo , tay salaknibam nan nakapsot isnan mangsoksokilan di napigsa dakapay badangan nan kodokdo ya kaseseg-ang isnan mangsos-owitik ken daida.”

¹¹ Nan megkamkampot et menkalida is ngawi maipanggep ken sak-en ay mangpabasol isnan egayak polos gin-gintek.

¹² Inikkak nan gawis ken daida ngem ngawi nan isobalitda isonga pilmi ay menseseg-angak.

¹³ Dapay isdin nasakitanda et ninseseg-angak isnan apo et ninbadowak is sako isnan ninpakombabaak dakpay mentepe pala ken daida.

¹⁴ Kanegko gayyem wenno besat nan inseseg-angak. Adiyak makasaldeng ay ninbabawi ay kaneg nan menseseg-angan di anak isnan matmateyan di inana.

¹⁵ Ngem idi sak-en nan maligatan et men-gasgasingda. Nadagopda ay mang-iiyaw dadapay menkalkali is baken tet-ewa ken sak-en ya maitapi pay nan ipogaw ay adiyak getgetken.

¹⁶ Kanegda nan ipogaw ay kedeng nan selat is getkenda dadapay am-ammengan sak-en.

¹⁷ apo, ay kaatna pay di kabayag nan apedmo mang-iilaan ken sak-en dapay maid polos ikkam? lsalakanmo sak-en ay dagos tay mangpateyda ay kanegda nan layon.

¹⁸ Et awnitak men-iyaman ken sik-a isnan madagopan nan ipogawmo. Owen, daydayawek sik-a isnan madagopan di kaipoipogaw.

¹⁹ Adim ipalobos ay mang-ammeng nan mangsape ken sak-en is maid gapona Adim ipalobos nan mangliliget ken sak-en is maid gapona ay menlagsakda isnan menseseg-angak.

²⁰ Baken olnos nan kananda nodi nan nemnemnemenda et nan kampot ay awnitda kankanan maipanggep nan manglayad is talna.

²¹ Ibotagda sak-en dadapay kanan en, “Heg, inilami met-a nan ngawi ay inikkam.”

²² Ngem sik-a apo et inilam met nan inikkanda isonga adim koma aped igiginek. Adika koma omaaddawi ken sak-en, apo.

²³ Bomangonka ta isalakanmo sak-en. Tomakdegka ta ibaliwam sak-en, Diosko ya Apok.

²⁴ Nalintegka, apo ay Diosko, isonga ipagtekmo ngalod ay nalintegak ya adim ipalobos ay men-gasgasing nan mang-ap-apos ken sak-en.

²⁵ Adim ipalobos ay kananda en, “Ostoosto ay inommat nan layden tako.” wenno kananda en, “Inabak tako dadlo siya.”

²⁶ Nan am-in ay men-gasgasing. isnan maligatak et pabainam koma, apo. Owen, maibabain ya makolkol koma nan nemnemda ay mangmangwani en gag-awisda mo sak-en.

²⁷ Dapay abes nan men-gasing isnan mawayaak et menlagsak ya men-gasgasingda koma. Ibiyadda koma ay mangmangwani en, “Madaydayaw nan apo ay magasgasingan isnan mangabakan nan baana.”

²⁸ Daket ipagtek nan kinalintegmo ya kanayon ay idayawko sik-a.