Salmo 34 - Kalin Apo Dios

¹ Kanayon ay mendayawak isnan apo. Adiyak somalsaldeng ay mang-ibagbaga isnan kinagawis ya kinapategna.

² Daydayawek siya gapo isnan inik-ikkana. Nan maligligat et dengngenda koma ta gomasingda.

³ Maitapi kayo ken sak-en ay mangipagtek isnan kinagawis nan apo datakot am-in idayaw nan ngadana.

⁴ Nindawatak isnan apo danat dengngen sak-en et wayaana sak-en isnan am-in ay egyatko.

⁵ Nan mendawat ken siya et mabadaganda ya adida polos mabab-ainan.

⁶ Isnan kinakapsotko et nindawatak ken siya danat dengngen sak-en. Insalakana sak-en isnan am-in ay ligatko.

⁷ Wada nan anghel nan apo ay mangbanbantay isnan mang-iyegyat ken siya et isalakana daida.

⁸ Padasenyo nan kinagawis nan apo. Nagasat nan menkamang ken siya.

⁹ Patgenyo nan apo, dakayo ay ipogawna tay nan mangpateg ken siya et maid menkolanganda.

¹⁰ Nan layon et maowatda no mamingsan tay maid kanenda ngem nan mangtongpal pay isnan apo et maid menkolanganda is gawis.

¹¹ Omali kayo ay ongong-a ta dengngenyo sak-en ta isolok ken dakayo nan ikkanyo ay mangpateg isnan apo.

¹² No sino ken dakayo nan manglayad ay gawis nan biyagna ya mentoltoloy nan men-gasgasingana

¹³ et baken nan ngawi wenno kampot is kankanana.

¹⁴ Masapol ay dokogana nan ngawi ta nan gawis nan ik-ikkana ya masapol ay kaykayatna nan nasimpa ay biyag ya siya nan pawedwedena.

¹⁵ No nan gawis di ik-ikkan nan ipogaw et kanayon ay nemnemen Apo Dios siya ya dengngena nan lowalona.

¹⁶ Ngem kaliliget Apo Dios nan mangik-ikkan isnan ngawi isonga pamaidena daida ya olay nan kanemnemnemanda et mamaid.

¹⁷ Men-adawag nan nalinteg isnan apo et idngena daida danat salakniban daida isnan am-in ay ligatda.

¹⁸ Somasag-en nan apo isnan menseseg-ang danapay isalakan daida ay namaid namnamada.

¹⁹ Olay no ado nan ligat di nalinteg ay ipogaw ngem isalakan kayet nan apo siya isnan maligatana.

²⁰ Ayowanan ay gawis nan apo siya et awnit maid magmagpong is tolangna.

²¹ Nan ngawi ay ik-ikkan nan ngawi et siya met laeng nan mangpatey ken siya. Awnit madosa nan mang-aamis isnan nalinteg ay ipogaw.

²² Awnit sobten nan apo nan babaana ta maid om-ommat isnan menkamang ken siya.