Salmo 33 - Kalin Apo Dios

¹ Dakayo ay nalinteg, men-gasing kayo ay mang-ikanta isnan dayawyo isnan apo tay omno ay dayawen nan nalinteg siya.

² Ikotengtengyo nan pangdayawyo. Owen, gitalaanyo nan kantayo.

³ Kantaenyo nan balo ay kanta ken siya. Owen, ikotengtengyo isnan am-in ay laingyo dakayo pay ibiyad nan gasingyo.

⁴ Tay tet-ewa nan kalin nan apo ya matalek isnan am-in ay ik-ikkana.

⁵ Laylaydena nan osto ya kinalinteg ya adi kakak-aan nan layadna isnan batawa.

⁶ Ninkali nan apo dat mawada nan daya. Nan agew, bowan ya nan taltalaw et nasapo gedan isnan kalina.

⁷ Pinonokna nan danom isnan baybay. Owen, inippeyna nan danom isnan adaem ay baybay.

⁸ Am-in kayo ay wada isnan batawa et patgenyo ya iyegyatyo koma nan apo

⁹ tay isnan ninkaliyana dat mawada nan batawa ya nan am-in isnan nangbilinana et nawadada.

¹⁰ Pamaiden nan apo nan panggep nan kailiili ya iyadina nan mang-ikkananda isnan panggepda.

¹¹ Ngem nan panggepna pay et mentoltoloy ay eng-enggana ya nan laydena et maid patenggana.

¹² Nagasat nan ili ay nan diosda et nan apo ya nan ipogaw ay pinilina ay menkowana.

¹³ Oosdongan nan apo id daya nan kaipoipogaw isnan batawa.

¹⁴ Isnan pagtolayana id daya et iilaena am-in ay mentetee isnan batawa.

¹⁵ Siya nan nang-idya isnan nemnemda et getkena nan am-in ay ik-ikkanda.

¹⁶ Maid mangabak is ali gapo is kaadon di sosoldadona ya adi masalakniban nan pigsan di napigsa ay ipogaw nan awakna.

¹⁷ Maid gedan maibadang di kabayo isnan gobat tay adi makaisalakan nan pigsada.

¹⁸ Ngem nan mangpateg isnan apo, et banbantayana daida ay mangtaltalek isnan adi menbalbaliw ay layadna

¹⁹ ta isalakana daida isnan tetey ya tatagowena daida isnan bitil.

²⁰ Nan apo nan kad-an di namnama tako tay siya nan kabadang ya kalasag tako isnan kaeegyat.

²¹ Men-gasing tako gapo ken siya tay siya nan taltalken tako.

²² apo, wada koma nan adi menbalbaliw ay layadmo ken dakami tay sik-a et kedeng nan namnamami.